Հրապարակուած է Արմէն Ճիկարխանեանի գերեզմանին տեղադրուելիք յուշարձանի լուսանկարը

2021-08-23
Image

ԽՍՀՄ ժողովրդական արուեստագէտ Արմէն Ճիկարխանեանի մահուան 9 ամիս անցած է, սակայն անոր գերեզմանին յուշարձանը դեռ չէ տեղադրուած: Քանդակը, որ պիտի տեղադրուի գերեզմանին, գրեթէ պատրաստ է:

Աւելին, Ճիկարխանեանի հարազատները սկսած են տեղադրման աշխատանքները, արդէն առկայ է հիմքը: Բարդութիւն առաջացուցած է այն, որ արուեստագէտը յուղարկաւորուած է քրոջ կողքին, տեղը քիչ է:

«Մենք ցանկանում ենք յուշարձան պատրստել, որն արժանի է Ճիկարխանեանին: Արմէն Պորիսովիչի մահուան տարելիցին` Հոկտեմբերի 14-ին ընդառաջ, ծրագրում ենք մահարձան տեղադրել։ Այդպէս է ընդունուած՝ ըստ հայկական աւանդոյթների։ Հիմքն արդէն պատրաստ է։ Սակայն պէտք է ժամանակ անցնի, հողը պէտք է հարթուի»,- դերասանի ընկերոջ՝ Արթուր Սողոմոնեանի խօսքերը մէջբերած է «Կոմսոմոլսկաիա պրավտա»-ն։

Յուշարձանի հեղինակը քանդակագործ Վահէ Սողոյեանն է, այն պատրաստուած պիտի ըլլայ կրանթէ ու պրոնզէ։ Արուեստագէտը պատկերուած պիտի ըլլայ հին հռոմէական փիլիսոփայ Սենեքայի՝ իր վերջին ներկայացման կերպարի դերով: