ԳՈՅԺ. Ոչ եւս է երախտաւոր Ընկ. Կարապետ Պապահէքեան

Ռամկավար Ազատական Կուսակցութեան Կեդրոնական Վարչութիւնը սրտի դառն կսկիծով կը գուժէ ազգային հասարակական գործիչ, հաւատաւոր վեթերան կուսակցական, ՌԱԿ Կեդրոնական Վարչութեան պատուոյ անդամ՝ Ընկ. Կարապետ Պապահէքեանի մահը, որ պատահեցաւ Կիրակի՝ 1 Նոյեմբեր 2020-ին, Պէյրութի մէջ։

Ընկեր Պապահէքեան իր ազգային-հասարակական հարուստ գործունէութեան ընթացքին ստանձնած է բազմաթիւ պատասխանատու պաշտօններ՝ Ռ.Ա.Կ.-ի, Թ.Մ.Մ.-ի եւ Հ.Բ.Ը.Մ.-ի շարքերէն ներս: Եղած է Թ.Մ.Մ. Հիմնադիրներու Մարմնի ատենապետ, Ռ.Ա.Կ. Լիբանանի Շրջանային Վարչութեան ատենապետ, Ռ.Ա.Կ. Կեդրոնական Վարչութեան անդամ եւ ապա՝ Պատուոյ անդամ:

Մաքրամաքուր հայրենասիրութեամբ աչքի ինկած Ընկ. Պապահէքեան անսակարկ նուիրումով աւելի քան վեց տասնամեակներ իր կեանքի առաքելութիւնը դարձուցած է Հայրենիքին ու հայութեան լուռ եւ անմանցորդ ծառայելը: Իր ազգային բեղուն գործունէութեան ընթացքին գործօն մասնակցութիւն ունեցած է Լիբանանահայ համայնքի ազգային եւ համայնքային կեանքէն ներս, իրեն յատուկ վեհանձնութեամբ եւ եզակի առատաձեռնութեամբ իր ե՛ւ նիւթական, ե՛ւ բարոյական նպաստը բերելով ազգին եւ հայրենիքին կարիքներուն:

Ան իր կարգապահութեամբ, նուիրումով, ազգասիրութեամբ եւ ծառայասիրութեամբ եղած է օրինակելի կուսակցական, որուն համար ալ վայելած է բոլորին յարգանքը՝ անխտիր:

Հանգուցեալի հոգեհանգստեան արարողութիւնը տեղի պիտի ունենայ Պէյրութի մէջ, Երկուշաբթի՝ 2 Նոյեմբեր 2020-ին, Ժամը 2:00-ին, Անթիլիասի Մայրավանքէն ներս:

Այս  տխուր  առիթով  Ռամկավար Ազատական Կուսակցութեան Կեդրոնական Վարչութիւնը իր խորազգաց  ցաւակցութիւնները  կը յայտնէ  հանգուցեալի այրիին, զաւակներուն, հարազատներուն եւ բարեկամներուն:

Օրհնութիւն անոր անթառամ յիշատակին եւ յաւերժ լոյս ու խաղաղութիւն անոր հոգիին:

ՌԱԿ Կեդրոնական Վարչութիւն