Անհրաժեշտ պատասխան՝ նախայարձակի համար հետեւանքներով. Փաշինեան հայ ռազմագերիներու գնդակահարման տեսանիւթի մասին

2022-10-03

«Հայաստան պիտի օգտագործէ միջազգային բոլոր գործիքակազմերը ատրպէյճանցի զինուորներու կողմէ Հայաստանի ինքնիշխան տարածքին մէջ հայ ռազմագերիներու խումբ մը գնդակահարելու ռազմական յանցագործութեան հետաքննութիւն ապահովելու եւ մեղաւորները պատասխանատուութեան ենթարկելու ուղղութեամբ: Բռնութեան այսպիսի արարքները պէտք է անհրաժեշտ պատասխան ստանան նախայարձակի համար հետեւանքներով»: «Արմէնփրես»-ի հաղորդումով` այս մասին յայտարարած է Հայաստանի Հանրապետութեան վարչապետ Նիկոլ Փաշինեան` «Թուիթըր»-ի վրայ կատարուած գրառումներու մէջ անդրադառնալով ատրպէյճանցի զինուորներու կողմէ հայ ռազմագերիները գնդակահարելու տեսանիւթին:

«Ընկերային ցանցերու մէջ սարսափելի տեսանիւթ մը եւս տարածուած է: Ատրպէյճանցի զինուորները կը գնդակահարեն հայ ռազմագերիներու խումբը Հայաստանի ինքնիշխան տարածքին մէջ: Միջազգային հանրութիւնը պէտք է յստակօրէն դատապարտէ եւ հասցէական գնահատական տայ այս պատերազմական յանցագործութեան, ինչպէս նաեւ քայլերու ձեռնարկէ Ատրպէյճանի նախայարձակումը կասեցնելու ուղղութեամբ»:

«Հայաստանը պիտի օգտագործէ միջազգային բոլոր մեքանիզմները հետաքննութիւն ապահովելու եւ մեղաւորները պատասխանատուութեան ենթարկելու ուղղութեամբ: Բռնութեան այսպիսի արարքները պէտք է անհրաժեշտ պատասխան ստանան նախայարձակի համար հետեւանքներով», -գրած է Փաշինեան: