Յիշենք մեր հերոսները. այսօր հայ ժողովուրդի անզուգական հերոս Զօր. Անդրանիկի ծննդեան օրն է

Այսօր հայ մեծ զօրավար Անդրանիկ Թորոսի Օզանեանի ծննդեան օրն է: 

Ան ծնած է 25 փետրուար 1865-ին` Արեւմտեան Հայաստանի Շապին Գարահիսար քաղաքին մէջ։ Անուրանալի ներդրում ու մասնակցութիւն ունեցած է Ազգային ազատագրական պայքարին մէջ`  ղեկավարած է հայդուկային խումբերը եւ ահուսարսափ  տարածած թշնամիի մօտ:

Անոր մուտքը Ազգային ազատագրական շարժում եղած է Սերոբ Վարդանեանի` Աղբիւր Սերոբի պարտիզանական ջոկատներով: Անդրանիկ Զօրավարը ղեկավարած է 1901-ի Առաքելոց վանքի կռիւները, կազմակերպած է Աղբիւր Սերոբին սպանած Պշարա Խալիլի սպանութիւնը։  Անդրանիկ Օզանեանի մասնակցութիւնը ազգային ազատագրական պայքարին չի սահմանափակուիր Հայաստանով: Ան իր անուրանալի դերը ունեցած է Պալքանեան պատերազմին: Օզանեանը 1912-ին հայ կամաւորներէ կազմակերպած է վաշտ` մասնակցելով Պալքանեան պատերազմին:

Զօրավարը արժանացած է 6 պարգեւի` «Պատուոյ լեգէոնի ասպետ», «Սուրբ Վլատիմիրի չորրորդ աստիճան», «Սուրբ Գրիգոր Լուսաւորչի առաջին աստիճան», «Սուրբ Սթանիսլավի 3-րդ աստիճան», «Կէորկիեւեան 2-րդ աստիճանի խաչ» եւ «Պատերազմական 2-րդ աստիճանի խաչ»:

1918-ի մայիսի 16-18-ին Վորոնցովկա աւանի մօտակայքը կեներալ-մայորի կոչման արժանացած Անդրանիկի ջոկատը զսպած է օսմանեան զօրքերը: 1918-ի մայիսի 25-28-ին Լոռիի ճակատամարտին Անդրանիկը վիժեցուցած է Դիլիջանի ուղղութեամբ թրքական զօրքերու գլխաւոր յարձակումը, ինչի շնորհիւ թրքական հրամանատարութիւնը ստիպուած եղաւ թողել Լեռնային Լոռի մարզի մեծ մասը։

Մեծ է Անդրանիկի դերը Զանգեզուրի պաշտպանութեան գործին մէջ. Անդրանիկի զօրքերն էին թուրքերու կողմէ Կովկասի գրաւման հիմնական խոչընդոտը, սակայն քաղաքական վերադասաւորումներու հետեւանքով ան հեռացաւ Հայաստանէն:

Կեանքի վերջին տարիները Անդրանիկ Օզանեան անցուց ԱՄՆ-ի մէջ եւ մահացաւ 31 օգոստոսի 1927-ին` թաղուելով Ֆրէզնոյի «Արարարտ» գերեզմանատան մէջ:  1928-ի յունուարին անոր աճիւնը փոխադրուած է Փարիզ եւ վերաթաղուած Պեր-Լաշէզ գերեզմանոցին մէջ, իսկ 2000-ին վերաթաղուած է Երեւանի Եռաբլուր պանթէոնին մէջ։