Հաղորդագրութիւն Ռ.Ա.Կ. Լիբանանի Շրջանային Վարչութեան            

Նկատի առնելով վերջին օրերուն կարգ մը կատարուած յայտարարութիւնները Լիբանանի մէջ տեղի ունենալիք Խորհրդարանի ընտրութիւններուն վերաբերեալ, Ռ.Ա.Կ. Լիբանանի Շրջանային վարչութիւնը կը յայտարարէ հետեւեալը.

1.Ռամկավար Ազատական Կուսակցութիւնը միշտ եղած է երկխօսութեան ջատագով եւ միշտ յարգած է ոեւէ հայորդիի կարծիք ու միշտ փորձած է հասնիլ միջին լուծումներու, միակ նպատակ ունենալով հայ ժողովուրդին գերագոյն շահը:

2.Անհատ կամ կազմակերպութիւն վարկաբեկելու կամ մարդոց ածական տալու սովորութիւնը խորթ է ռամկավար գաղափարախօսութեան հաւատացող ամէն անհատի համար: Այս սովորութեան տարածումը մեզ կը տանի վտանգաւոր մակարդակի, որ հեռու է ամէն ռամկավար ազատականի գաղափարախօսութենէն:

3.Ընտրական տրամաբանական ծրագիրը ու այդ ծրագիրը գործադրելու կարողութիւնը այն երկու գործօններն են, որոնք կը յաջողցնեն կամ կը ձախողցնեն թեկնածու մը: Կաշառքի մուտքը մեր ընկերութեան մէջ, մանաւանդ 1990-ական թուականներէն սկսեալ կործանեց իսկական ընտրութիւնը եւ զայն վերածեց մարդ գնելու հոլովոյթի, փոխանակ իսկական քուէ ստանալու, ըստ իր կատարելիք կամ կատարած գործին եւ ունեցած արդիւնքին: Արդիւնքը մենք տեսանք 2019 թուականին, երբ Լիբանանի տնտեսութիւնը փլուզում արձանագրեց այդ գնուած քուէներուն պատճառով, որովհետեւ չկար իսկական հաշուետուութիւն իրերայաջորդ կառավարութիւններու կողմէ:

4.Երեսփոխանը ի վերջոյ Լիբանանի երեսփոխան է եւ ան կրնայ նաեւ ընտրուիլ ոչ-հայ քուէով, ան ըլլալով հայ ազգի զաւակ, ամէն ջանք ի գործ պէտք է դնէ պաշտպանելու համար հայ համայնքին իրաւունքները այս համայնքային դրութեամբ գործող երկրին մէջ: Հայերէն գիտնալը նաեւ անհրաժեշտ է ամէն հայ թեկնածուի համար, կարենալ մօտէն շփուելու համար մեր ազգի զաւակներուն հետ:

5.Հայ ըլլալը ազգային պատկանելիութեան զգացում է: Լոզունգ չէ: Հայ ազգի մշակութային  ժառանգին հաւատացողն է հայը: Հայութեան դատին հաւատացողն է հայը: Ոեւէ հայ անձ չի կրնար պիտակաւորել դիմացինը «հայ» թէ «ոչ հայ»:

6.Հայկական քաղաքական կազմակերպութիւնները մեծ գործ կատարած են Հայոց ցեղասպանութենէն ետք համայնքը ծաղկեցնելու համար: Անոնք են որ հիմնած են դպրոց, եկեղեցի, ակումբ, մամուլ, մշակութային եւ մարզական միութիւններ: Այս դերը ոչ ոք կրնայ ուրանալ:

7.Հաշուետուութիւնը պէտք է կորիզը կազմէ մեր քաղաքական աշխատանքին: Այն կազմակերպութեան կամ միութեան մէջ, ուր չկայ հաշուետուութիւն, այդ կազմակերպութիւնը ուշ կամ կանուխ պիտի բռնէ փլուզումի ճամբան: Մարդիկ, կուսակիցներ եւ համակիրներ պիտի սկսին հեռանալ այդ կառոյցէն եւ իրենց քուէն պիտի տան դրական ուժերու, որոնք պիտի փորձեն գրաւել այդ կազմակերպութիւններուն տեղը: Վերջին տարիներուն դժբախտաբար մենք ականատես կը դառնանք այս երեւոյթին Լիբանանի հայ համայնքին մէջ:  

8.Շինիչ քննադատութիւնը եւ տարբերակներու ներկայացումը պէտք է ըլլան միակ ոճը իրարու հետ խօսելու: Ձայն բարձրացնելով եւ օրէնքէն վեր դասուելու փորձով մենք չենք կրնար հաստատել կայուն երկխօսութիւն ու հասնիլ համայնքին հարցերը լուծելու:

9.Ռամկավար Ազատական Կուսակցութեան Լիբանանի Շրջանային վարչութեան պարագային ներկայիս կ'օգտագործուի «հերձուած» բառը: Այս բառը կը նշանակէ օրէնքէն դուրս կամ օրէնք չյարգող: Երբ խումբ մը կւսակցականներ իրենց անձնական շահերէն մեկնելով չեն ընդունիր օրինաւոր եւ մեծամասնութեան քուէով ընտրուած, ծառայասէր եւ մտաւորական ընկերներէ բաղկացած Կեդրոնական վարչութեան օրինականութիւնը, հարցում մը կը հարցնենք, թէ ո՞վ է հերձուածը, օրինականութեան հետեւողները եւ ընդհանուրի շահին մասին մտածողները, թէ իրենց անձնական շահերը պաշտպանողները: Մեր կուսակցութեան մէջ փոփոխութեան մէկ ձեւ կայ: Մարդիկ համոզել ձեր ծրագիրով որ ձեզ ընտրեն: Եթէ ընտրուիք, պիտի ըլլաք հաշուետու ձեզ ընտրողին: Հակառակ պարագային պիտի ընդունիք մեծամասնութեան քուէով ընտրուած ղեկավարը ու չփորձէք ձեր անձնական հաշիւներէն մեկնելով պառակտում յառաջացնել կուսակցութեան մէջ:

10.Ռամկավար Ազատական Կուսակցութեան Լիբանանի Շրջանային վարչութիւնը կը գումարէ ժողովներ լիբանանեան եւ հայկական կուսակցութիւններու եւ թեկնածուներու հետ: Նպատակը Խորհրդարանի ընտրութեան թեկնածուներու ծրագիրներու ծանօթացումն է ու դրական որոշում կայացնելը, որպէսզի Խորհրդարան հասնին նուիրեալ եւ ազնիւ լիբանանցի հայորդիներ ու քաղաքացիներ: Վարչութիւնը մօտ օրէն պիտի յայտարարէ իր նախընտրած թեկնածուին անունը:

11.Ընտրութեան արդիւնքները ըլլան մեր համայնքի եւ Լիբանանի օգտին եւ ոչ թէ հատուածի մը կամ անձի մը օգտին: Այս պէտք է ըլլայ մեր գերագոյն նպատակը:

Պէյրութ, 13 Մարտ 2022