Ատրպէյճանական զինծառայողները խախտած են Տեղ գիւղի բնակիչներու իրաւունքները. ՀՀ ՄԻՊ

2021-07-21

 Ատրպէյճանական զինծառայողները 19 Յուլիսի 2021-ի յանցաւոր արարքներով խախտած են ՀՀ Սիւնիքի մարզի Տեղ գիւղի բնակիչներու իրաւունքները, դիմատետրեան իր էջին գրած է ՀՀ ՄԻՊ Արման Թաթոյեանը:

Մասնաւորապէս, բողոքներու եւ ահազանգերու հիման վրայ ՀՀ մարդու իրաւունքներու պաշտպանի փաստահաւաք աշխատանքները պարզած են հետեւեալը.

Նախ, պարզուած է, որ Սիւնիքի մարզի Տեղ գիւղի բնակիչներէն մէկը 19 Յուլիս 2021-ին՝ առաւօտեան ժամը 10-10:30-ի սահմաններուն գիւղատնտեսական աշխատանքներ կատարած է իրեն եւ իր ընտանիքին օրինական փաստաթուղթերու հիման վրայ սեփականութեան իրաւունքով պատկանող հողատարածքին մէջ: Ան, մասնաւորապէս, իրականացուցած է հացահատիկի բերքահաւաք մեքենայով:

Երբ մեքենան եզրային հատուածներէն մէկուն մէջ աւարտած է աշխատանքները եւ այդ վայրէն գտնուած է շուրջ 150 մեթր հեռաւորութեան վրայ՝ դէպի ՀՀ տարածքի խորքը, նկատած է, որ իրեն կը մօտենան ատրպէյճանական շարք մը զինուած ծառայողներ: Մօտենալով՝ ատրպէյճանական զինծառայողները զէնքով սպառնացած են Տեղ գիւղի բնակիչին, գոռգոռացած ու քաշքշած են վերջինիս, փորձած են անոր hարկադրաբար տեղափոխել դէպի իրենց դիրքեր:

Փաստահաւաք աշխատանքները կը հաստատեն, որ ատրպէյճանական զինուած ուժերու ծառայողները փաստացի ապօրինաբար ազատութենէ զրկած են իր հողատարածքին մէջ մեքենայով հացահատիկի բերքահաւաք իրականացնող Տեղ գիւղի բնակիչին, տեւական ժամանակով խոչընդոտած են գիւղատնտեսական աշխատանքներու իրականացումը:

Համայնքի ղեկավարի, ՀՀ զինուած ուժերու ու տեղի ռուսական սահմանապահ զօրքերու հրամանատարական կազմերու ջանքերով բնակիչն ու իր մեքենան վերադարձուած են հայկական կողմին: