Կը բացառեմ, որ ՍԴ նոր նախագահ ընտրուի Հրայր Թովմասեանը. Ալեն Սիմոնեան

2020-09-16

«Արթուր Վաղարշեանի անկեղծութիւնը, ազնւութիւնը, անմիջականութիւնը մեզի վստահութիւն ներշնչեց»։ Այս մասին Ազգային ժողովին մէջ լրագրողներու հետ զրոյցի ընթացքին յայտարարեց ԱԺ-ի փոխխօսնակ Ալեն Սիմոնեան՝ անդրադառնալով այն հարցին, թէ ի՞նչ դրդապատճառով երկրորդ անգամ ընտրեցին Արթուր Վաղարշեանը։

Ինչ կը վերաբերի երեք թեկնածուներու ընտրութեան եւ իրենց հասցէին հնչող քննադատութիւններուն, թէ դաւաճանեցին յեղափոխութիւնը, Սիմոնեան կ'ըսէ, թէ ի սկզբանէ ըսած են, որ չեն ուզեր ունենալ ՍԴ, որ պիտի ըլլայ խամաճիկային կամ պատկանի իշխանութեան, այլ  իշխանութիւնը պիտի ձեւաւորէ ՍԴ, որ պիտի ըլլայ նոր, պիտի ըլլայ սկզբունքային․

«Ես չեմ համարեր, որ այստեղ որեւէ մէկուն դաւաճաներ ենք: Պէտք է հասկնալ, թէ որոնք են այդ խօսողները: Ես կը վստահեցնեմ, որ ինչ թեկնածու ալ բերէինք, մշտապէս պիտի ըլլան տարբեր շահեր: Տարբեր պատգամաւորներ, հրապարակախօսներ, վերլուծաբաններ մշտապէս կ'ունենան իրենց պատկերացումները»։

Հարցին, թէ ասով հանգուցալուծուեցա՞ւ ՍԴ-ի ճգնաժամը, Ալեն Սիմոնեան արձագանգեց.

«Դեռ շատ ժամանակ կայ անցնելու, դեռ շատ ընելիքներ ունինք ոչ միայն ՍԴ-ի մէջ, այլ ամբողջ դատական համակարգին մէջ»:

Ալեն Սիմոնեան բացառեց, որ ՍԴ-ի նոր կազմի կողմէն կրկին նախագահ կ'ընտրուի Հրայր Թովմասեանը։

Դիտարկման, որ մէկ կողմէ իշխանութիւնը կը յայտարարէ, որ խամաճիկային Սահմանադրական դատարան չ'ուզեր ունենալ, միւս կողմէ ՍԴ-ի դատաւոր ընտրեց Երուանդ Խունդկարեանը, զոր կը մեղադրեն նախկին իշխանութիւններու կամակատար ըլլալու մէջ, Ալեն Սիմոնեան արձագանգեց.

«Ես ատոր հետ համաձայն չեմ, ես կը գտնեմ, որ այս ժամանակահատուածին պարոն Խունդկարեանը եղած է այն մարդոցմէ, որուն հետ մենք չենք ունեցած գէթ մէկ օրինակ, ուր ինքը խամաճիկի դերի մէջ եղած է»:

Ալեն Սիմոնեան հերքեց այն լուրերը, թէ գործադիր իշխանութենէն ճնշումներ կամ յորդորներ եղած են քուէարկելու այս թեկնածուներու օգտին:

«Մեր խմբակցութիւնը քննարկած է եւ կայացուցած է միասնական որոշում, որն ալ իրականացուցած է»,- ըսած է ԱԺ փոխխօսնակը: