Պատմական. Հայաստանի ֆութպոլի ընտրանին երրորդ անընդմէջ յաղթանակը տօնեց

2021-03-31
Image

Ֆութպոլի ազգային ընտրանին այսօր հերթական յաղթանակը տարաւ Աշխարհի առաջնութեան ընտրական փուլին:

Հայաստանի հաւաքականը սեփական յարկի տակ ընդունած էր Ռումանիոյ ընտրանին։ Առաջին խաղակէսին կոլեր չգրանցուեցան, սակայն երկրորդ խաղակէսը կոլառատ էր:

Խաղի հաշիւը 56-րդ վայրկեանին բացաւ հաւաքականի կազմին մէջ իր նորամուտը նշող Էտուարտ Սպերցեանը: Խաղի 62-րդ վայրկեանին Ալեքսանտրու Չիքալտաուն հաւասարեցուց հաշիւը, այնուհետեւ 72-րդ վայրկեանին  «տուպլ» ձեւակերպեց:

77-րդ վայրկեանին Ալեքսանտրու Փուշկաշը հեռացուեցաւ խաղադաշտէն կոպիտ խախտման համար: 10- հոգիով մնացած ռումանացիները չկարցան դիմակայել Հայաստանի հաւաքականի ֆութպոլիստներու ճնշման. խաղի 87-րդ վայրկեանին Վարազդատ Հարոյեանը  հաշիւը հաւասարեցուց, իսկ 89-րդ վայրկեանին Տիգրան Բարսեղեանը  յաջող իրացուց 11 մեթրանոց հարուածը՝ հաշիւը դարձնելով 3:2:

Այս պահուն Հայաստանի ընտրանին 9 միաւորով կը գլխաւորէ J խումբի մրցարաշարային աղիւսակը:

Յաղթանակէն անմիջապէս ետք կարճ գրառումով մը հանդէս եկաւ Հայաստանի վարչապետ Նիկոլ Փաշինեան, գրելով. «Յաղթել պարտութիւններից յետոյ, յաղթել պարտուելիս, տանել կամային յաղթանակ։ Մեր հաւաքականի այսօրուայ յաղթանակը՝ անշուշտ նուիրուած է Քոմանտոսին եւ մեր բոլոր ինկած եղբայրներին»:

Հայաստանի ընտրանին պատմական արդիւնք գրանցեց աշխարհի առաջնութեան ընտրական փուլին` երրորդ անընդմէջ յաղթանակը տօնելով: Հայաստան-Ռումանիա` 3:2:

Մոնտիալի ընտրական փուլի 4-րդ շրջանի հանդիպումը Հայաստանի հաւաքականը պիտի ունենայ սեպտեմբերին` արտագնայ խաղին, մրցելով Հիւսիսային Մակեդոնիոյ դէմ: Այդ խաղը նախատեսուած է 2 սեպտեմբերին: Այնուհետեւ` 5 սեպտեմբերին Կապառոսի ընտրանին պիտի հիւրընկալէ Գերմանիան, իսկ 8-ին Երեւանի մէջ պիտի ընդունի Լիխթընշթայնը: