Գերման քաղաքական գործիչներ Լաչինի անցքը վերաբանալու կոչ ըրած են
Գերմանիոյ արտաքին քաղաքական գործիչները կոչ կ'ընեն Ատրպէյճանին՝ դադրեցնելու Լաչինի միջանցքի արգելափակումը դէպի Լեռնային Ղարաբաղի տարածաշրջան, ուր 120 հազար մարդ օրեր շարունակ կտրուած է բոլոր մատակարարումներէն։
«Արմէնփրէս»-ի հաղորդմամբ՝ Պունտեսթագի ՔԴՄ (Քրիստոնեայ-դեմոկրատական միութիւն)/ՔՍՄ (Քրիստոնէական Սոցիալական Միութիւն) խորհրդարանական խումբի արտաքին քաղաքականութեան հարցերով խօսնակ Եուրկէն Հարտթը կոչ ըրած է Ատրպէյճանի կառավարութեան դադրեցնելու Հայաստանի եւ Լեռնային Ղարաբաղի միջեւ Լաչինի միջանցքի շրջափակումը։
«Հակառակ որ Ատրպէյճանը կը պնդէ, որ դիւանագիտական լուծում կը փնտռէ, հակամարտութիւնը չի հանդարտիր», -ըսած է Հարտթը RedaktionsNetzwerk Deutschland (RND)-ին ու աւելցուցած. «Ակնյայտօրէն, շրջափակողներուն կ'աջակցի Պաքուն: Պաքուի կառավարութիւնը պէտք է անյապաղ դադրեցնէ շրջափակումը»:
Պունտեսթագի Կանաչներ խմբակցութեան արտաքին քաղաքականութեան հարցերով խօսնակ Եուրկէն Թրիթինը եւս Ատրպէյճանէն պահանջած է անյապաղ դադրեցնել Լեռնային Ղարաբաղի շրջափակումը, հակառակ պարագային՝ մարդասիրական աղէտ կը սպառնայ։
«Ատրպէյճանի նախագահ Իլհամ Ալիեւին նոյնպէս պէտք են յստակ ազդանշաններ Եւրոպայէն, որ ան պէտք է ազատէ Լաչինի միջանցքը: Ատրպէյճանի նոր դերը, որպէս Եւրոպայի համար ուժանիւթի կարեւոր մատակարար, պէտք չէ պատճառ ըլլայ, որ Պրիւքսէլ մեղմ արձագանգէ»,-ըսած է Թրիթին։
