Ունինք համաձայնութիւն՝ համատեղ ջանքերով վերանորոգելու Անիի կամուրջը. Արարատ Միրզոյեանը՝ Չաւուշօղլուին
Անգարայի մէջ կայացած է Հայաստանի եւ Թուրքիոյ արտաքին գործոց նախարարներու առանձնազրոյցը, որմէ ետք տեղի ունեցած է ընդլայնուած կազմով հանդիպում, որուն յաջորդած է նախարարներու համատեղ մամլոյ ասուլիսը, ուր արտաքին գործոց նախարարները հանդէս եկած են յայտարարութիւններով:
Ասուլիսի ժամանակ ՀՀ արտաքին գործոց նախարար Արարատ Միրզոյեան իր ելոյթին մէջ նշած է. «Յարգելի պարոն Չաւուշօղլու, յարգելի ներկաներ, նախեւառաջ ՀՀ անունից եւս մէկ անգամ ցաւակցութիւն եմ յայտնում աւերիչ երկրաշարժին զոհ գնացած բազմահազար մարդկանց ընտանիքներին, Թուրքիայի ժողովրդին ու կառավարութեանը եւ շուտափոյթ ապաքինում եմ մաղթում բոլորին:
Իմ ժողովրդի պատմութեան ամենադառը էջերից մէկը 1988 թուականի Սպիտակի աւերիչ երկրաշարժն էր եւ այսօր մեզ համար խորթ չէ այն վիշտը, որն այցելել է Թուրքիայի հազարաւոր ընտանիքների: Նմանօրինակ բնական աղէտներն ու դրանց ծաւալները դուրս են գալիս պետութիւնների սահմաններից դառնալով համամարդկային ողբերգութիւններ: Աշխարհը դրանք յաղթահարելու համար պէտք է գործի միասնական ճակատով: Ես հաւատացած եմ, որ միջազգային հանրութիւնը մոլորակի որեւէ կէտում տեղի ունեցող որեւէ հումանիտար ճգնաժամի պարագայում չպէտք է անտարբեր մնայ: Եւ հէնց այս սկզբունքով էր, որ Հայաստանի կառավարութիւնը աղէտալի երկրաշարժից անմիջապէս յետոյ որոշում կայացրեց Թուրքիա ուղարկել փրկարարներ եւ հումանիտար օգնութիւն:
Ես շնորհակալ եմ պարոն Չաւուշօղլուին մեր փրկարարների հասցէին եւ ընդհանուր առմամբ հայկական ներկայութեան եւ աջակցութեան կապակցութեամբ արտայայտած գնահատանքի խօսքերի համար: Շատ ուրախ եմ, որ հայ փրկարարներին իրենց գործընկերների աջակցութեամբ յաջողուել է անել ամենակարեւորը այս իրավիճակում՝ փրկել մարդկային կեանքեր:
Խորհրդանշական եմ համարում նաեւ, որ շաբաթ օրը շուրջ 30 տարի փակի տակ գտնուող հայ-թուրքական սահմանը բացուեց Ատըեաման ուղեւորուող հումանիտար օգնութեամբ բարձուած հայկական բեռնատարների համար: Նոյնը տեղի ունեցաւ երէկ երեկոյեան եւ ժամեր անց հումանիտար օգնութեան հերթական խմբաքանակը կը հասնի Ատըեաման:
Այս դժուարին պահին գտնուելով Թուրքիայում, եւս մէկ անգամ ցանկանում եմ վերահաստատել տարածաշրջանում խաղաղութիւն կառուցելու եւ մասնաւորապէս, Թուրքիայի հետ յարաբերութիւնների ամբողջական կարգաւորման, դիւանագիտական յարաբերութիւնների հաստատման ու Հայաստանի ու Թուրքիայի միջեւ սահմանի ամբողջական բացման հարցում Հայաստանի պատրաստակամութիւնը եւ ձգտումը:
Ուզում եմ տեղեկացնել, որ այսօր մենք քննարկել ենք այս գործընթացին վերաբերող որոշակի մանրամասներ, ունենք համաձայնութիւն համատեղ ջանքերով վերանորոգել Անիի կամուրջը, ինչպէս նաեւ հոգ տանել համապատասխան ենթակառուցուածքների մասին սահմանի ամբողջական բացմամնն ընդառաջ»:
