Արեւմուտքը աւելի մեծ համբերութիւն ունի, քան Վլատիմիր Փութինը․ Միւնիխի անվտանգութեան համաժողովի նախագահ

Միւնիխի անվտանգութեան համաժողովի նախագահ Քրիսթոֆ Հոյսկեն իր եզրափակիչ ելոյթին մէջ յայտարարած է, որ Արեւմուտքը աւելի մեծ համբերութիւն ունի, քան Ռուսիոյ Դաշնութեան նախագահ Վլատիմիր Փութինը։ Անոր ելոյթը հեռարձակուած է համաժաղովի կայքին մէջ:

Իր ելոյթին մէջ Հոյսկեն խօսած է «անդրաթլանթեան միասնութեան» մասին՝ նշելով, որ Արեւմուտքը «յստակ ազդանշան» տուած է։

«Եկած ենք, որ մնանք։ Եւ մենք աւելի մեծ համբերութիւն ունինք, քան Վլատիմիր Փութինը»,- շեշտած է համաժողովի նախագահը՝ աւելցնելով, որ Արեւմուտքը պէտք է կատարէ «իր տնային առաջադրանքները» եւ մեծցնէ պաշտպանական արդիւնաբերութեան համար նախատեսուած ծախսերը Ուքրանիոյ աջակցելու համար։

«Խաղաղութիւնը երկխօսութեան միջոցով կը հաստատուի: Մենք շատ ուրախ ենք, որ Միւնիխի անվտանգութեան համաժողովի շրջածիրէն ներս, ինչպէս նախորդ տարի, շատ երկխօսութիւններ տեղի ունեցած են», -ըսած է Հոյսկեն:

Անոր խօսքով՝ այս տարի ամենավառ տպաւորութիւններէն մէկը Ուքրանիոյ նախագահ Վլատիմիր Զելենսքիի տեսաելոյթն էր։ Հոյսկեն յոյս յայտնած է, որ յաջորդ տարի ուքրանացի առաջնորդը անձամբ ներկայ կը գտնուի համաժողովին։