Փութին-Շառլ Միշէլ քննարկում. Թեման Ղարաբաղն է
Հեռախօսազրոյց ունեցած են Եւրոպական Խորհուրդի նախագահ Շարլ Միշէլը եւ Ռուսաստանի նախագահ Վլատիմիր Փութինը: Ի թիւս այլ հարցերու, կողմերը անդրադարձած են նաեւ Լեռնային Ղարաբաղի մէջ անվտանգութեան ապահովման:
«Անդրադարձ կատարուած է նաեւ Լեռնային Ղարաբաղի մէջ կայունութեան եւ անվտանգութեան ապահովման թեմային, այդ շարքին` հաշուի առնելով վերջերս Վլատիմիր Փութինի եւ Շարլ Միշէլի շփումները Հայաստանի եւ Ատրպէյճանի ղեկավարներուն հետ», կը հաղորդէ Քրեմլինի մամլոյ ծառայութիւնը:
Հաղորդագրութեան մէջ նաեւ կ’ըսուի․ «Վերահաստատուած է 2020 թուականի Նոյեմբեր 9-ին, 2021 թուականի Յունուար 11-ին եւ Նոյեմբեր 26-ին Հայաստանի, Ատրպէյճանի եւ Ռուսաստանի միջեւ եռակողմ համաձայնագրերու հետեւողական իրականացման հիմնարար կարեւորութիւնը: Այս ծիրին մէջ, Ռուսաստանի նախագահը տեղեկացուցած է տնտեսական եւ ճանապարհային կապերու վերականգնման ծրագրերու իրականացման, ինչպէս նաեւ հայ-ատրպէյճանական սահմանի սահմանազատման եւ երկու երկիրներու միջեւ խաղաղութեան պայմանագրի շուրջ բանակցութիւններու մեկնարկին ուղղութեամբ ձեռնարկուող քայլերուն մասին»:
Եւրոպական Խորհուրդի նախագահին գրասենեակը հեռախօսազրոյցին մասին մանրամասնութիւններ առայժմ չի հաղորդեր:
Պաշտօնական Մոսկուան նախօրէին յայտարարած է, որ Պրիւքսէլը կ’ուզէ Ռուսաստանէն խլել միջնորդութիւնը հայ-ատրպէյճանական հաշտեցման գործընթացին մէջ:
