Հայ գերիները ենթարկուած են բռնութեան եւ նուաստացման. Human Rights Watch

2020-12-03

Human Rights Watch կազմակերպութեան հետ հանդիպման ընթացքին ես ներկայացուցած էի ատրպէյճանական վայրագութիւնները՝ շեշտելով, որ գերիներու վերադարձն ու մարմիններու փոխանակումը կը պահանջէ հրատապ լուծում։ Այս մասին դիմատետրեան իր էջին գրած է ՀՀ Մարդու իրաւունքներու պաշտպան Արման Թաթոյեանը։

Ան, մասնաւորապէս, նշած է.

«Human Rights Watch-ը քիչ առաջ հրապարակել է զեկոյց ու արձանագրել, որ ատրպէյճանական ուժերը գերեվարել են բազմաթիւ էթնիք հայ զինուորականների: Ըստ զեկոյցի՝ հայ գերիները ենթարկուել են բռնութեան ու նուաստացման: Այդ մասին վկայում են տեսանիւթերը, որոնք հոկտեմբերից լայնօրէն տարածուել են ընկերային ցանցերում:

Կազմակերպութիւնը յատուկ նշում է արել, որ ատրպէյճանական զինուած ուժերը հայ գերիների նկատմամբ կիրառել են հարկադրանք՝ ունենալով նրանց նուաստացնելու դիտաւորութիւն:

Human Rights Watch կազմակերպութեան հետ հանդիպման ընթացքում ինքս ներկայացրել էի ատրպէյճանական վայրագութիւնները՝ շեշտելով, որ գերիների վերադարձն ու մարմինների փոխանակումը պահանջում է հրատապ լուծում։

Մենք շարունակում ենք միջազգային մարմիններին ներկայացնել ատրպէյճանական զինուած ուժերի խոշտանգումներն ու դաժանութիւնները՝ պատերազմական յանցագործութիւններ: Նպատակն է ամէն ջանք գործադրել՝ աջակցելու համար գերիների վերադարձի ու զինուորների մարմինների փոխանակման րոպէ առաջ կազմակերպմանը»։