Որոշեր եմ տեղափոխուիլ Արցախ եւ պատրաստ եմ օգնելու Արցախին եւ Արցախի ժողովուրդին ուժերուս ներածին չափով. Մանէ Թանտիլեան
Որոշեր եմ տեղափոխուիլ Արցախ եւ պատրաստ եմ օգնելու Արցախին եւ Արցախի ժողովուրդին ուժերուս ներածին չափով: Այս մասին իր դիմատետրեան էջին գրած է «Լուսաւոր Հայաստան» կուսակցութեան անդամ, նախկին պատգամաւոր Մանէ Թանտիլեանը:
«ԱՊՐԵԼՈՒ ԱՐՑԱԽ
Սիրելի հայ ժողովուրդ,
Մեր երկիրն այսօր ապրում է մեր պատմութեան ամենածանր ժամանակներից մէկը։ Մեր ցաւը խորն է ու ծանր, աներեւակայելի՝ հերոս զինուորների ծնողների, հարազատների վիշտը․․․
Մեր հերոս տղաները իրենց կեանքը չեն խնայել Արցախի համար, ուրեմն՝ Արցախը պէտք է ապրի, նաեւ մեր պարտքն է՝ ապրեցնել Արցախը։ Պատահածից յետոյ շատ դժուար է շարունակել ապրել, մտածել, ելքեր փնտռել, բայց պարտաւոր ենք․․․ պարտաւոր ենք վերականգնուել, վերաիմաստաւորել արժէքներ, չյանձնուել ու չհրաժարուել ուժեղ, խելացի, հզօր Հայաստան ու Արցախ ունենալու երազանքից՝ վերածելով այդ երազանքը ամէնօրեայ չափելի գործողութիւնների եւ արդիւնքի։ Այլապէս, ի՛նչ իմաստ ունի մեր գոյութիւնը այսքանից յետոյ։
Մենք պարտուել ենք ճակատամարտը, պատերազմը սակայն դեռ չի աւարտուել։ Նոր ճակատամարտում մենք պէտք է ապրենք, զարգանանք, հզօրանանք՝ յանուն վերջնական յաղթանակի։
Սիրելի հայրենակիցներ, ինչպէս նախկինում յայտնել եմ, ունեմ առողջական խնդիրներ, որի բուժման նպատակով հոկտեմբերին պէտք է մեկնէի արտերկիր, սակայն պատերազմը շատերիս փոխարէն որոշումներ կայացրեց։ Պատերազմի աւարտից անմիջապէս յետոյ այցելեցի Արցախ։ Ծանօթանալով ստեղծուած իրավիճակին՝ ինձ պարզ դարձաւ, որ ընդհատում եմ բուժումս եւ տեղափոխւում ապրելու Արցախ։ Պարզապէս ապրելու․․․
Այդ ժամանակ իմ իսկ նախաձեռնութեամբ հանդիպել եմ Արցախի նախագահ Արայիկ Յարութիւնեանին, տեղեկացնելով, որ որոշել եմ տեղափոխուել Արցախ եւ պատրաստ եմ օգնելու Արցախին եւ Արցախի ժողովրդին ուժերիս ներածի չափով։ Արցախի նախագահը ուրախ էր դա լսել եւ խնդրեց դիտարկել մի քանի հնարաւորութիւն։
Այսօր արդէն Արցախում եմ եւ հետագայ անելիքներիս մասին հնարաւորութիւն կ'ունենամ տեղեկացնելու։ Սակայն վստահ եմ՝ ինչպիսի ձեւաչափով էլ լինի, ինչ կարգավիճակում էլ լինեմ, արդէն որոշել եմ իմ առաջիկայ անելիքը՝ ապրել եւ ապրեցնել Արցախը հայերէն․․․
Խորին յարգանքով՝
Մանէ Թանտիլեան»։
