Վե՛ր կաց ու արի Արցախ, այստեղ քեզ սպասում են․ ԱՀ ՄԻՊ

2021-06-28

Այցելեցէ՛ք Արցախ, այցելեցէ՛ք գոնէ միայն անոր համար, որ Արցախի մէջ ապրող 100 հազար հայերը իրենց մինակ չզգան, ձեր ներկայութեամբ դուք պիտի գօտեպնդէք եւ ոգեւորէք Արցախի մէջ ապրող հայը, որ Արցախը ընդմիշտ հայկական պահէ, դիմատետրի իր էջին գրած է ԱՀ ՄԻՊ Գեղամ Ստեփանեանը։

Գրռումը կը ներկայացնենք ստորեւ․

«Սիրելի՛ հայրենակիցներ, սիրելի՛ հայեր, սիրելի՛ մարդիկ,

Եօթ ամիս է անցել այն օրից, երբ մեր 30-ամեայ իրականութիւնն ամբողջութեամբ փոխել է իր կերպարանքը․ ամէն տարուայ այս ժամանակաշրջանը Հայաստանի Հանրապետութիւնում, Սփիւռքում ապրող մեր հայրենակիցների եւ  օտարերկրացիների համար Արցախը բացայայտելու, բնութեան անապակ մաքրութիւնը վայելելու, բազմադարեայ հայկական ու քրիստոնէական մշակոյթին հաղորդակից լինելու ժամանակներ էին։ Պատերազմի մշտական վտանգի տակ ապրող երկիրը միեւնոյն ժամանակ հոգու հանգստութիւն էր հաղորդում իւրաքանչիւրին՝ առյաւէտ կապելով այս հողի հետ։

Շատ բան է փոխուել․․․Այսօր Արցախում շատ են դժուարութիւնները, պատերազմի հետեւանքներն Արցախին ինչ-որ առումով զրկել են իր նախկին հմայքից, բայց ոչ երբեք իր իմաստից ու խորը բովանդակութիւնից։

Մենք անցել ենք պատերազմի դաժանութիւնների միջով, 44 օրուայ ընթացքում տեսել ու զգացել ենք մարդկային ու անմարդկային բոլոր տառապանքները եւ, ցաւօք, այսօր էլ շարունակում ենք զգալ․․․

Բայց մենք այստեղ ենք՝ նոյն տեղում, նորից կանգնելու յոյսով․․․ Բոլորիդ հետ միասին․․․

Այցելէ՛ք Արցախ, այցելէ՛ք գոնէ միայն նրա համար, որ Արցախում ապրող 100 հազար հայերն իրենց մենակ չզգան, ձեր ներկայութեամբ դուք գօտեպնդելու եւ ոգեւորելու էք Արցախում ապրող հային, որ Արցախն ընդմիշտ հայկական պահի։

Գիտեմ, որ Արցախ այցելելու հետ կապուած անվտանգային առումով մտահոգութիւններ ունէք, մտահոգութիւններ ունէք ճանապարհի հետ կապուած, որի մի հատուածում ստիպուած էք, ցասումը զսպելով, տեսնել գերեվարուած Շուշին, դժուարութիւններ կան Սփիւռքի մեր հայրենակիցներին Արցախի մուտքի արտօնագիր տրամադրելու ժամկէտների հետ կապուած, բայց պէտք է յաղթահարել այս ամէնը՝ յանուն գերակայ նպատակի, յանուն Արցախը չկորցնելու։
Վե՛ր կաց ու արի, այստեղ քեզ սպասում են ․․․»։