«Քորոնա»ի խնդրով դրական տեղաշարժ

2020-07-30

Վերջին օրուայ ընթացքին «Քորոնա» ժահր հաստատուած է 308 մարդու մօտ: Դրական եղած է Յուլիս 28-ին կատարուած 1853 հետազօտութիւններու 16,6 տոկոսը: Ասիկա վերջին ամիսներուն լաւագոյն ցուցանիշն է:

Նախորդ շաբթուայ ընթացքին, «Քորոնա» ժահր հաստատուած էր հետազօտուողներու 20-25 տոկոսին մօտ: Աւելի վաղ այս ցուցանիշը կը հասնէր 30 եւ աւելի տոկոսի:

Առողջապահութեան նախարարութեան մամլոյ քարտուղար՝ Ալինա Նիկողոսեանի խօսքով, այս դրական միտումը հակահամաճարակային կանոններուն հետեւելուն արդիւնքն է. - «Վերջին մի քանի ամսուան ընթացքին սկսեր ենք աւելի զգօն ըլլալ, եւ ես յոյս ունիմ, որ այս ընթացքը կը շարունակուի»:

Ընդհանուր առմամբ՝ Հայաստանի մէջ մինչեւ օրս հաստատուած է «Քորոնա» ժահրի 37937 դէպք: Ինչպէս նախորդ շաբթուայ ընթացքին, երէկ եւս առողջացածներու թիւը կը գերազանցէ վարակուածներունը: Քովիտը յաղթահարողներու թիւը նախորդ օրը աւելցած է 467-ով: Վարակը արդէն յաղթահարած է 27824 մարդ: Այս պահուն հիւանդութենէն փաստացի կը բուժուի 9165 անձ:

Ծանր ծայրայեղ ծանր վիճակի մէջ գտնուող հիւանդները հիմնականօրէն կը բուժուին «Սուրբ Գրիգոր Լուսաւորիչ» բժշկական կեդրոն, որու փոխ տնօրէն Պետրոս Մանուկեան «Ազատութեան» հետ զրոյցին այսօր նշեց, որ որոշակի դրական փոփոխութիւն կայ: Անոր խօսքով, եթէ նախապէս իրենց հիւանդանոցին մէջ մարդոց տեղաւորելու խնդիր կար, ապա այժմ մահճակալներու 15-20 տոկոսը ազատ են:

Անոր կարծիքով, «Քորոնա» ժահրը յաւերժ չի կրնար շրջանառուիլ ու նոյնքան աշխոյժ մնալ:

Երէկուայ տուեալներով Հայաստանի մէջ ծանր վիճակի մէջ է «Քորոնա» ժահրով 453 հիւանդ, 81 մարդ՝ ծայրայեղ ծանր, 26 մարդու միացուած է թոքերու արհեստական օդափոխութեան սարք: