Արցախի հարցով ծածուկ բանակցուիւններու մասին խօսակցութիւններն անտրամաբանական են. վարչապետը ընդունած է ԱՀ պատուիրակութիւնը
ՀՀ վարչապետ Նիկոլ Փաշինեան այսօր` Ապրիլ 29-ին ընդունած է Արցախի Հանրապետութենէն ժամանած պատուիրակութիւնը` նախագահ Արայիկ Յարութիւնեանի գլխաւորութեամբ:
Ան իր խօսքին մէջ, մասնաւորապէս նշեց, որ թէ՛ 44-օրեայ պատերազմէն առաջ, թէ՛ յետոյ Հայաստանը մշտապէս իր աշխատանքները համաձայնեցուցած է Արցախի հետ:
«Կարեւոր ենք համարել, որ Արցախի իշխանութիւնները լիարժէք տեղեկացուած լինեն մեր ծրագրերի, անելիքների վերաբերեալ, այդ թւում` Լեռնային Ղարաբաղի հիմնախնդրին վերաբերող բանակցութիւնների բովանդակութեանը եւ ընթացքին, մարտահրաւէրներին եւ հնարաւորութիւններին: Այս սկզբունքը պահուել է միշտ, եւ շարունակելու է այդպէս լինել:
Գիտէք, ես երբեմն մտածում եմ, թէ այդ մասին յատուկ շեշտադրում անելու անհրաժեշտութիւն չկայ, որովհետեւ դա այնքան տրամաբանական փաստ է, որ շեշտադրելը նոյնիսկ երբեմն կարող է աւելորդ լինել: Բայց եւս մէկ անգամ ուզում եմ արձանագրել, որ Լեռնային Ղարաբաղի հիմնախնդրի կարգաւորման թիւ մէկ շահառուն Արցախն է եւ Արցախի ժողովուրդը: Եւ, հետեւապէս, այնպիսի բովանդակութիւն, որ բանակցուի եւ իրագործուի ծածուկ, ուղղակի անտրամաբանական է, եւ նման բան երեւակայելն ուղղակի անհնար է: Այս է պատճառը, որ մենք մշտապէս, պարոն նախագահ, Ձեզ հետ անձամբ կապի մէջ ենք: Նաեւ մեր միւս գործընկերներն աշխատում են զուգահեռ Արցախի գործընկերների հետ», ըսաւ ան:
Նիկոլ Փաշինեան` դիմելով Արցախի նախագահին` նշեց. «Կարեւոր եմ համարում եւ բարձր եմ գնահատում Ձեր` վերջին շրջանում արած մի յայտարարութիւն այն մասին, որ Արցախի իշխանութիւնները նոյնպէս, ըստ էութեան, որդեգրում են խաղաղութեան օրակարգը: Եւ ես ուզում եմ ասել, որ խաղաղութեան օրակարգն ամենեւին էլ պարտութեան օրակարգ չէ:
Խաղաղութեան օրակարգը պատերազմի արհաւիրքը եւ պատերազմին յաջորդած դժուարութիւնները յաղթահարելու, ժողովրդի անվտանգութիւնը, իրաւունքները, ապագան երաշխաւորելու օրակարգ է: Եւ պիտի ասեմ, որ շատ դաժան, դժուար աշխատանքի արդիւնքում ես պէտք է այսօր արձանագրեմ, որ տեսնում եմ այն ճանապարհը, ընդ որում` տեսնում եմ այն քայլերի յաջորդականութիւնը, որոնք մեզ պէտք է յանգեցնեն այն հանգրուանին, որի մասին մենք անընդհատ խօսում ենք, քննարկում ենք եւ որի մասին բարձրաձայնել ենք: Այն է` Հայաստանի Հանրապետութեան, Արցախի Հանրապետութեան ժողովրդի անվտանգութեան եւ իրաւունքների երաշխաւորումը, եւ, ինչպէս նախկինում ասել եմ, շատ կարեւոր սկզբունք կայ, որ արցախցին ապրի Արցախում, իրեն համարի արցախցի, ղարաբաղցի եւ հայ: Եւ այս է այն օրակարգը, որ մենք համատեղ պէտք է առաջ մղենք», յայտնած է Փաշինեանը:
