Դեկտեմբեր 10-ին Հայաստանը պիտի մասնակցի «3+3» ձեւաչափի հանդիպման
Հայաստանը «3+3» բանակցային ձեւաչափով կրնայ հետաքրքրուած ըլլալ, եթէ պարզուի, որ այդ հարթակով պիտի չքննարկուի այնպիսի հարցեր, որոնց քննարկման վերաբերեալ Հայաստանը ներգրաւուած է այլ ձեւաչափերու մէջ: Կառավարութեան ուղղուած հարց ու պատասխանի ժամանակ այս մասին յայտարարեց ՀՀ վարչապետ Նիկոլ Փաշինեանը՝ պատասխանելով «Քաղաքացիական պայմանագիր» խմբակցութեան պատգամաւոր Հռիփսիմէ Գրիգորեանի հարցին, թէ ի՞նչ է Հայաստանի դիրքորոշումը «3+3» ձեւաչափի վերաբերեալ։
Վարչապետը նշեց, որ այս հարցը քննարկեր են ՌԴ գործընկերներու հետ եւ կայ ազդակ, որ իրենք ալ կը կիսեն հայկական կողմի տեսակէտը։
«Առաջիկայ օրերին, եթէ չեմ սխալուում՝ դեկտեմբերի 10-ին, 3+3 կամ 3+2 ֆորմատի (ձեւաչափի) նախնական նիստի նման հանդիպում է տեղի ունենալու, որին Հայաստանը մասնակցելու է ԱԳ փոխնախարարի տեղակալի մակարդակով, որովհետեւ այդ ֆորմատով է տեղի ունենալու այդ նախահանդիպումը, որտեղ կը քննարկուեն հետագայ անելիքները։ Շարունակութիւնն՝ ըստ այդ քննարկման արդիւնքների»,-ըսաւ Փաշինեան։
«Վեց երկիրներու հարթակ»ի կամ այլ կերպ ըսած՝ «3+3» (Ռուսաստան, Իրան, Թուրքիա, Հայաստան, Ատրպէյճան, Վրաստան) ձեւաչափ ստեղծելու գաղափարը 2020 թ. վերջերուն առաջարկեր է Թուրքիոյ նախագահ Էրտողանը:
