Էմանուէլ Մաքրոնը զօրակցութեան նամակ յղած է վարչապետ Նիկոլ Փաշինեանին

2020-06-30

Ֆրանսայի նախագահ Էմանուէլ Մաքրոնը զօրակցութեան նամակ յղած է վարչապետ Նիկոլ Փաշինեանին: Ինչպէս յայտնած են ՀՀ վարչապետի աշխատակազմի տեղեկատւութեան եւ հասարակայնութեան հետ կապերու վարչութենէն,  նամակին մէջ նշուած է.

«Պարոն Վարչապետ, թանկագին Նիկոլ,

Տեղեկացայ վերջերս «Քորոնա» ժահրէն Ձեր ապաքինման մասին եւ ուրախ եմ, որ Դուք եւ Ձեր ընտանիքը առողջ էք:

Այսօր Ֆրանսայի, ինչպէս նաեւ Հայաստանի առջեւ առողջապահական, տնտեսական եւ ընկերային առումով ծառացած են խոշոր մարտահրաւէրներ: Ճգնաժամը պէտք չէ մեզի ստիպէ ընկրկիլ: Ընդհակառակը, համավարակը պէտք է համագործակցութեան եզակի առիթ հանդիսանայ՝ պայքարելու համաճարակին եւ անոր հետեւանքներուն դէմ:

Այս ոգիով ալ կ'ուզեմ հաւաստիացնել Ձեզի Ֆրանսայի համերաշխութեան եւ Հայաստանին աջակցութիւն ցուցաբերելու վերջինիս պատրաստակամութեան մէջ: Միաժամանակ ե՛ւ Եւրամիութեան աննախադէպ նիւթական օժանդակութեան մէջ ունեցած ներդրմամբ, ե՛ւ երկկողմ աջակցութեամբ Ֆրանսան Ձեր կողքին է: Յառաջիկայ օրերուն Ֆրանսան կրկին Հայաստան պիտի գործուղէ կամաւորական բժիշկներու նոր խումբ, որ փոխարինման պիտի գայ արդէն իսկ ներկաներուն, որոնք իրենց հայ գործընկերներուն կ'օգնեն Covid-19-ի դէմ մղուող պայքարին մէջ:

Այս ճգնաժամը նաեւ մարտահրաւէր է մեր երկու երկիրներու տնտեսութեան համար: Հայաստանի մէջ արդէն գործող Զարգացման ֆրանսական գործակալութեան (ԶՖԳ) շնորհիւ Ֆրանսան պատրաստ է դիտարկել 50-80 միլիոն եւրօ գնահատուող պետական քաղաքականութեան վարկի տրամադրումը, ինչը հնարաւորութիւն պիտի ընձեռէ մասամբ հոգալ պիւտճէթային ֆինանսաւորման լրացուցիչ կարիքները, որոնց Ձեր երկիրը կը դիմագրաւէ այս տարի: ԶՖԳ այս ծրագիրը, որ նպատակ ունի ամրապնդել ճգնաժամերուն դիմագրաւելու երկրի կարողութիւնները, պիտի իրականացուի այլ վարկատու կազմակերպութիւններու հետ համատեղ, ինչպիսին, օրինակ, Համաշխարհային դրամատունն է: Շեշտը կրնայ դրուիլ առողջապահութեան եւ ընկերային պաշտպանութեան ոլորտներուն, ինչպէս նաեւ կլիմայական փոփոխութիւններու հետեւանքներու սահմանափակմանն ուղղուած գործողութիւններուն վրայ:

Յոյս յայտնելով, որ մեր համերաշխութեան եւ բարեկամութեան կապերը ամրապնդուած դուրս կու գան այս փորձութենէն՝ հաճեցէք ընդունիլ, պարոն Վարչապետ, յարգանացս հաւաստիքը»: