Հայաստանը ժողովրդավարութեան 2021-ի ցուցիչով տարածաշրջանի առաջատարն է
The Economist մետիաընկերութեան վերլուծական կեդրոնը (Economist Intelligence Unit) հրապարակած է 2021-ի ժողովրդավարութեան ցուցիչը (Democracy Index 2021), որով մոլորակի պետութիւնները կը դասուին չորս խումբերու` լիակատար ժողովրդավարութիւն, թերի ժողովրդավարութիւն, հիպրիտային իշխանակարգ եւ մենատիրութիւն:
Զեկոյցը կազմելով, փորձագէտները հաշուի կ'առնեն հինգ հիմնարար գործօններ` ընտրական գործընթացներ եւ բազմակարծութիւն, կառավարութեան արդիւնաւէտութիւն, քաղաքական ներգրաւուածութիւն, քաղաքական մշակոյթ եւ քաղաքացիական ազատութիւններ:
Անոնց վերլուծութեամբ տուեալ երկիրը կը ստանայ ընդհանուր գնահատական եւ կ'որոշուի երկրին տեղը սանդղկակին վրայ:
Հայաստանը կը համարուի հիպրիտային իշխանակարգով երկիր: Ընտրական գործընթացներու եւ բազմակարծութեան գնահատականը` 5 եւ կէս, կառավարութեան գործունէութեան արդիւնաւէտութիւնը` 5.71, քաղաքական ներգրաւուածութիւնը` 6.11, քաղաքական մշակոյթը` 3.13 եւ քաղաքացիական ազատութիւնները` 5:
Այսպիսով Հայաստանին տրուած է ընդհանուր գնահատական` 5.49, որով երկիրը 2021 թուականի ժողովրդավարութեան ցուցիչով զբաղեցուցած է 89-րդ տեղը:
Հարկ է նշել, որ Հայաստանը տարածաշրջանին մէջ ունի լաւագոյն դիրքը: Իրաւապաշտպան հեղինակաւոր միջազգային կեդրոնները ժողովրդավարութեան գործընթացներու հարցով ամէն տարի կը կազմեն տարատեսակ զեկոյցներ եւ շատ յաճախ տարածաշրջանին մէջ առաջատար կը ճանչցուի Վրաստանը:
Մինչդեռ, այս զեկոյցով Վրաստանը Հայաստանի պէս հիպրիտային համարուած է եւ 5.12 ընդհանուր գնահատականով 91-րդ տեղը գրաւած է: Հիպրիտային է նաեւ Թուրքիան, որ ունի 4.35 միաւոր եւ 103-րդն է:
Տարածաշրջանի երեք մնացեալ պետութիւնները` Ռուսաստանը, Ատրպէյճանը եւ Իրանը ճանչցուած են մենատիրական:
Ռուսաստանը 3.24 միաւորով 124-րդն է, աւելի վատ վիճակի մէջ Ատրպէյճանը` 2.68 միաւոր, 141-րդ տեղ: Յետնապահը Իրանն է` 1.95 միաւոր, 154-րդ տեղ:
