Վստահ եմ, որ մեր երկրին բաժին հասած փորձութիւններից դուրս ենք գալու աւելի ուժեղ․ ՀՀ նախագահ
Հանրապետութեան նախագահ Վահագն Խաչատուրեանը շնորհաւորական ուղերձ յղած է Ամանորի առթիւ․
«Հայաստանի Հանրապետութեան յարգելի քաղաքացիներ,
Սիրելի հայրենակիցներ,
Րոպէներ անց մենք կը շրջենք 2022 թուականի օրացոյցի վերջին էջն ու մուտք կը գործենք 2023 թուական:
Անցնող տարին մեր պետականութեան համար լի էր փորձութիւններով ու մարտահրաւէրներով: Մեր պետութեան ինքնիշխանութեան ու անկախութեան համար շարունակական պայքարով ու ձեռքբերումներով, անդառնալի կորուստներով, սահմանային լարուածութեամբ ու արցախահայութեան առջեւ ծառացած անվտանգային սպառնալիքներով:
2023 թուականի նախաշեմին, ես ցանկանում եմ, որ մեզանից իւրաքանչիւրը մեր ընտանիքներում, մեր տօնական սեղանների շուրջ, մտովի ամփոփելով անցնող տարին, մի ակնթարթ յետհայեացք նետի եւ տեսնի, թէ ի՞նչ է թողնելու անցնող տարում եւ ի՞նչը պէտք է վերցնի իր հետ՝ դէպի գալիք նոր տարիներ:
Ինչ փորձով ու գիտելիքով ենք մենք քայլ անելու դէպի եկող տարի, ինչ յոյսերով, կամքով եւ հաւատամքով ենք մենք, որպէս պետութիւն, որպէս ազգ ու հաւաքական հանրութիւն շարունակելու մեր ուղին՝ դէպի մեր նուիրական երազանքի՝ զարգացող, բարեկեցիկ, անվտանգ ու խաղաղ Հայաստան:
Հենց այսպիսի Հայաստան ունենալու համար, ես հաւատում եմ, որ մեր ժողովուրդը կարող է գիտակցել ու գնահատել իր պատմական փորձն ու փորձառութիւնը, հաւատում եմ, որ այդ գիտակցման հանրագումարում մենք կարող ենք գտնել մեր բաղձալի հայրենիքի կերտման ներուժը:
Վստահ եմ նաեւ, որ մեր երկրին բաժին հասած փորձութիւններից մենք դուրս ենք գալու աւելի ուժեղ, ամուր ու իմաստացած:
Սիրելի ժողովուրդ,
Գալիք տարում մեր պետութեան, մեր քաղաքացիների ու պետական այրերի առաջնահերթութիւնները շարունակում են մնալ մեր երկրի զարգացումն ու հզօրացումը:
Մեր սահմանների խաղաղութեան ու անվտանգութեան, Արցախի մեր հայրենակիցների արժանապատիւ ապրելու եւ իրենց հազարամեայ հայրենիքում արարելու իրաւունքների ապահովումը, Լեռնային Ղարաբաղի հիմնախնդրի արդարացի հանգուցալուծումը:
Սիրելի հայրենակիցներ,
Գալիք 2023 թուականին ընդառաջ ցանկանում եմ մաղթել բոլորիս խաղաղութիւն, անսպառ ընտանեկան երջանկութիւն, տոկունութիւն, խաղաղ ու ստեղծագործ աշխատանք՝ ի շահ եւ ի բարօրութիւն Հայաստանի Հանրապետութեան:
Շնորհաւոր Նոր տարի»։
