Տոնոյեան կ'առաջարկէ քննիչ յանձնաժողովի բաց նիստ կայացնել՝ իր եւ Փաշինեանի մասնակցութեամբ

Պաշտպանութեան նախկին նախարար Դաւիթ Տոնոյեանը յայտարարութիւն տարածած է՝ նշելով, որ կը բացառէ իր մասնակցութիւնը ԱԺ քննիչ յանձնաժողովի աշխատանքներուն: Տոնոյեանը նաեւ կ'առաջարկէ իր եւ Նիկոլ Փաշինեանի մասնակցութեամբ կայացնել քննիչ յանձնաժողովի բաց, հանրային նիստ։

Յայտարարութիւնն ամբողջութեամբ կը ներկայացնենք ստորեւ․

«Հաշուի առնելով ԱԺ Քննիչ յանձնաժողովի (ՔՅ) նախագահի (Անդրանիկ Քոչարեանի – խմբ․) յայտարարութիւնը` յանձնաժողովի աշխատանքին իմ մասնակցութեան «վերապահման» վերաբերեալ, ինչպէս նաեւ լրատուամիջոցներից ստացուած բազմաթիւ հարցադրումները, ներկայացնում եմ մօտեցումներս ՔՅ գործունէութեան եւ իմ մասնակցութեան վերաբերեալ:

Իրաւունքներիս եւ ազատութիւններիս անհեթեթ մեղադրանքով սահմանափակուած լինելու պայմաններում եւ անձնապէս, եւ իրաւական առումով բացառում եմ մասնակցութիւնս ԱԺ ՔՅ աշխատանքներին:

Պատճառներից կարեւորագոյնն այն է, որ 44-օրեայ ռազմական գործողութիւններին վերաբերող, դրանց նախորդող, ինչպէս նաեւ յաջորդող տեղեկատւութիւնը դասակարգուած է, որին չեմ կարող տիրապետել անհիմն եւ ապօրինի կալանքի պատճառով:

Յանձնաժողովում հարցադրումներին ստոյգ եւ լիարժէք փաստերով պատասխանելու համար անհրաժեշտ է լիարժէք տիրապետել նշուած տեղեկատւութեանը, որն ինձ հասանելի չէ, քանի որ 2020 թուականի նոյեմբերի 20-ից որեւէ առնչութիւն չունեմ ՊՆ գործունէութեան հետ, ինչպէս նաեւ շուրջ 1 տարի 7 ամիս մեկուսացուած եմ՝ շինծու քրէական գործով։

Արգելանք է դրուած նաեւ լրատուամիջոցների հետ իմ անմիջական շփման վրայ, այդպիսով սահմանափակուած է անգամ թոյլատրելիութեան սահմաններում լրագրողների միջոցով հանրութեան հարցադրումներին արձագանգելու հնարաւորութիւնս:

Անկախ փորձագէտների եւ ԱԺ ընդդիմադիր խմբակցութիւնների ներկայացուցիչների բացակայութիւնը ՔՅ նիստերին ոչ միայն հարցեր է առաջացնում վերջինիս աշխատանքի անկողմնակալութեան վերաբերեալ, այլեւ պարարտ հող է հանդիսանում քաղաքական շահարկումների, զրպարտանքների եւ դիլետանտական բամբասանքների շարունակութեան համար:

Վերջապէս, ՔՅ նախագահող անձը չի կարող անաչառ լինել իր գնահատականներում՝ հաշուի առնելով 2020 թուականի նոյեմբերի 9-ից յետոյ իմ եւ Զինուած ուժերի հասցէին իր կողմից արուած անպատասխանատու յայտարարութիւնները, որոնց մասամբ արձագանգել էր Պաշտպանութեան նախարարութիւնը` 2020թ․ նոյեմբերի 17-ին եւ 2020թ․ նոյեմբերի 19-ին։

2021 թուականի յունուարին «Մեդիամաքս»ին տուած հարցազրոյցում թոյլատրելիի սահմաններում անդրադարձել եմ 44-օրեայ պատերազմին վերաբերող հարցերին։ Ինչպէս ասել եմ դեռեւս 2020թ. նոյեմբերի 20-ի իմ ուղերձում, պատրաստ եմ կրել իմ բաժին պատասխանատւութիւնը: Ուստի առաջարկում եմ իմ եւ Նիկոլ Փաշինեանի մասնակցութեամբ անցկացնել Քննիչ յանձնաժողովի բաց, հանրային նիստ, որի ընթացքում կը պատասխանենք հանրութեանը հետաքրքրող բոլոր հարցերին»,- ըսուած է յայտարարութեան մէջ։