Ո՞ւր սխալեցաւ Նաթանիահուն. «Մոսատ»ի նախկին ղեկավար

2021-06-10

Վարչապետ Բենիամին Նաթանիահուն խախտած է Իրանի հետ յարաբերութիւններու մէջ երկրի ռազմավարութիւնը: Այս մասին յայտարարած է Մոսատի նախկին ղեկավար Թամիր Պարտոն, յայտնած է JPost-ը:

Անոր խօսքով՝ Նաթանիահուն լուրջ ռազմավարական սխալ թոյլ տուած է՝ Իրանի պատճառով բացայայտ հակամարտութեան մէջ մտնելով Օպամայի ու Պայտընի վարչակազմերու հետ: «Մոսատի» նախկին ղեկավարը հարցուցած է, թէ ինչպէս Նաթանիահուն համարձակած է յայտարարել, որ Երուսաղէմը լիովին պիտի անտեսէ Ուաշինկթընին այն պարագային, երբ Ամերիկան ​​կը տրամադրէ ինչպէս օդանաւերը, այնպէս ալ զէնքերը, որոնք Իսրայէլը կ'օգտագործէ:

«Մենք պէտք է ամէն ինչ ընենք, որ թոյլ չտանք Իրանին միջուկային զէնք ստեղծել», սակայն Նաթանիահուն սխալմամբ սա գոյացական սպառնալիք համարած է, իբրեւ, եթէ Իրանը երբեւէ նման զէնք ստեղծէ, բոլոր հրեաները պէտք է փախին Մերձաւոր Արեւելքէն, նշած է ան:

«Մոսատի» նախկին ղեկավարը նշած է, որ Նաթանիահուի քաղաքականութիւնը օգնած է Թրամբի վարչակազմին դուրս գալ Իրանի հետ 2015-ի միջուկային համաձայնագրէն, որ յանգեցուցած է անոր, որ Թեհրանը անցած է ուրանի՝ մինչեւ 60 տոկոս հարստացման:

Պարտոյի խօսքով՝ «Իրանը անգամ չէ երազած», որ իրենք կրնային հասնիլ ուրանի հարստացման նման աննախադէպ բարձր մակարդակի, սակայն Իսրայէլի կողմէ ռազմավարութեան բացակայութիւնը, Թրամբի վարչակազմի հետ միասին, յանգեցուցին անոր, որ «այաթոլլաները շաբաթներու ընթացքին կրնան միջուկային զէնք ստեղծել»: Ան Նաթանիահուի ղեկավարած Իսրայէլին մեղադրած է «առաջին կարգի մարտավարութեան, սակայն զէրոյական ռազմավարութեան» մէջ: