Դատարանի որոշումով Հրանդ Տինքի ընտանիքը 1.5 միլիոն լիրա փոխհատուցում պիտի ստանայ

2021-10-14

Թուրքիոյ Պետական խորհուրդը (Danıstay-բարձրագոյն վարչական դատարան) հաստատած է «Ակօս»-ի նախկին խմբագիր Հրանդ Տինքի կնոջ՝ Ռաքէլ Տինքի, անոնց զաւակներու՝ Սերա, Տելալ եւ Արատ Տինքերու 1.5 միլիոն լիրա (շուրջ 168.000 տոլար) փոխհատուցման պահանջը բաւարարող Պոլսոյ 6-րդ վարչական դատարանին որոշումը։ Այս մասին կը հաղորդէ Ermenihaber.am-ը՝ վկայակոչելով sabah.com.tr-ը։

Պետական խորհուրդը այդպիսով չէ բաւարարած Թուրքիոյ ներքին գործոց նախարարութեան (ՆԳՆ) բողոքը եւ ընդունած է Տինքի ընտանիքի այն պնդումը, որ ՆԳՆ-ն ծանր ծառայողական թերացում եւ առարկայական պատասխանատւութիւն ունեցած է ընտանիքի հայր, պոլսահայ լրագրող Հրանդ Տինքի սպանութեան գործին մէջ։

Նշենք, որ Տինքի ընտանիքը Թուրքիոյ ՆԳՆ-ի դէմ հայց ներկայացուցած էր Պոլսոյ 6-րդ վարչական դատարան։ Անոնք պնդած էին, որ նախարարութիւնը ծառայողական թերացում ունեցած է Հրանդ Տինքի սպանութեան գործին մէջ։ Տինքի ընտանիքը պահանջած էր 1.5 միլիոն թրքական լիրայի փոխհատուցում, որուն 500 հազարը՝ նիւթական, իսկ 1 միլիոնը բարոյական վնասի համար։ Դատարանը միաձայն բաւարարած էր հայցը, սակայն ՆԳՆ-ն բողոքարկած էր դատարանի վճիռը։