Պոլսոյ Պատրիարքին եւ Կարօ Փայլանին միջեւ հեռակայ վէճ
Պատրիարքական ընտրութիւններէն շուրջ կէս տարի անց, Թուրքիոյ խորհրդարանի հայազգի պատգամաւոր Կարօ Փայլանը ու Պոլսոյ Հայոց պատրիարք Սահակ արքեպիսկոպոս Մաշալեանը հեռակայ բանավէճի բռնուած են ընտրութիւններու օրինականութեան հարցի շուրջ:
Օրերս Փայլան կրկին յայտարարած էր, թէ չի ճանչնար Մաշալեան արքեպիսկոպոսը, որպէս պատրիարք, ընտրական գործընթացը համարելով անարդար:
Սահակ երկրորդ պատրիարքը, հակադարձելով Փայլանին, նախօրէին իր ֆեյսպուքեան էջին վրայ գրած է, որ ինք ընտրուած է արդար պայքարով, ստանալով քուէարկող պատուիրակներու ձայներու մեծամասնութիւնը: Ան նաեւ շեշտած է, որ պատրիարք ընտրուելու կապակցութեամբ շնորհաւորանքներ ստացած է Թուրքիոյ եւ Հայաստանի ղեկավարութիւններէն, հոգեւոր եւ աշխարհիկ բարձրաստիճան այրերու կողմէն, որոնք ոչ մէկ կասկած չեն յայտնած ընտրութեան արդիւնքներու օրինականութեան վերաբերեալ:
Յիշատակելով իր նախորդին՝ Մեսրոպ Մութաֆեան պատրիարքին եւ Հրանդ Տինքի միջեւ եղած հակասութիւնները, Սահակ Մաշալեան ցաւով արձանագրած է, որ Փայլանի այսպիսի դիրքորոշումը կրնայ պառակտիչ ազդեցութիւն ունենալ ներհամայնքային կեանքին վրայ: Այնուհանդերձ, Մաշալեան պատրիարք կը յուսայ, որ «յետդարձի ճանապարհ դեռ կայ, եւ Փայլան չէ այրած բոլոր կամուրջները»:
Ի պատասխան՝ Կարօ Փայլան գրած է, թէ ուղղուած քննադատութեան նպատակը Պոլսոյ պատրիարքական աթոռը աւելի ուժեղ տեսնելն է: Ան նշած է, որ այս դժուարին ժամանակաշրջանին, կործանիչ բանավէճերը հայ համայնքին ամենաքիչը պէտք են, առաջարկելով ուժերը կեդրոնացնել կուտակուած համայնքային խնդիրներու լուծման վրայ:
12 տարի սպասելէ յետոյ, անցեալ տարուայ դեկտեմբերին Սահակ Մաշալեան հոգեւոր ու աշխարհական պատուիրակներէն կազմուած Ազգային պատգամաւորական ժողովի կողմէն ընտրուեցաւ Պոլսոյ Հայոց 85-րդ պատրիարք: Թուրքիոյ ներքին գործոց նախարարութեան կողմէ նոր պատրիարքի ընտրութեան համար ուղարկուած կանոնադրութեան համաձայն՝ պատրիարքի թեկնածու կրնային ըլլալ միայն Պոլսոյ պատրիարքական աթոռին ենթակայ եպիսկոպոսները: Այս սահմանափակումով խոչընդոտուած էր Թուրքիայէն դուրս ծառայող շարք մը եպիսկոպոսներու առաջադրուելու հնարաւորութիւնը, ինչ որ դժգոհութեան ալիք բարձրացուցած էր պոլսահայ համայնքին մէջ:
