Հայաստանի համար տնտեսական աճի դրական ցուցանիշներ. Տարին պիտի փակուի 7 տոկոս աճով
Այս տարի Հայաստանի տնտեսական աճը աւելի բարձր պիտի ըլլայ, քան ծրագրուած է պետական պիւտճէի մէջ, կամ տարուան սկիզբը կը կանխատեսէին միջազգային ֆինանսական կառոյցները:
Արժոյթի միջազգային հիմնադրամի հայաստանեան ներկայացուցիչ Եուլիա Ուստիւկովայի խօսքով, կը սպասուի, որ տարին Հայաստանը պիտի փակէ մինչեւ 7 տոկոս տնտեսական աճով, մինչդեռ այսօր «Ազատութեան» հետ զրոյցի ժամանակ ան յիշեցուցած է, որ դեռ ապրիլին հիմնադրամը կանխատեսած էր 4,6 տոկոս տարեկան տնտեսական աճ:
«Գալիք տարուան տնտեսական աճի համար մեր կանխատեսումը մեծամասամբ նոյնական է Հայաստանի կառավարութեան կանխատեսման հետ: Այս տարուան համար կը կանխատեսենք 6,5-7 տոկոս աճ, 2020 թուականի եւ միջնաժամկէտ հեռանկարի համար աճը կը կանխատեսենք 4,5 տոկոսէն 5 տոկոսի շրջակայքը: Կը կարծեմ՝ նման կանխատեսումը հիմնաւորուած է», - ըսած է ան:
Ուստիւկովան ներկայացուցած է պատճառը, որ յանգեցուցած է աւելի բարձր տնտեսական աճի. - «Այս տարուան հայաստանեան տնտեսական աճն աւելին է, քան մենք կը սպասէինք: Այո, անցած մէկ տարուան մենք վերանայեցանք մեր կանխատեսումները, որովհետեւ սպառումն ու յատկապէս մասնաւոր սպառումը Հայաստանի մէջ շատ աւելի աշխոյժ էր, քան կանխատեսած էինք: Անշուշտ, դրական է, որ տնտեսական աշխոյժութիւնը կ'աճի, սակայն այդքան ալ լաւ չէ, որ նման աճի պատճառը սպառումն է, ոչ թէ ներդրումները, որովհետեւ ներդրումներն են, որ հիմք կը ստեղծեն ապագայ աճի համար: Ուստի, մարտահրաւէրները կը շարունակեն մնալ՝ ինչպէս ստեղծել կայուն, երկարատեւ տնտեսական աճ, այնպիսի աճ, որուն հիմքը ըլլայ ներդրումներն ու արտահանումը, ոչ թէ սպառումը», - յայտարարած է ԱՄՀ հայաստանեան ներկայացուցիչը:
«Ազատութեան» հարցին՝ ինչո՞վ կը բացատրէ ներդրողներու պակասը, ան պատասխանած է. - «Կը կարծմ՝ կը համաձայնիք, որ անցած տարի Հայաստանն անցումային փուլի մէջ էր: Այն փուլի մը մէջ էր, երբ իշխանութիւնները դեռ կ'աշխատէին ռազմավարութիւններու, առաջնահերթութիւններու ուղղութեամբ, որոնք ապագային առաջ պիտի մղեն տնտեսութիւնը: Այդ իսկ պատճառով ներդրողներու մօտ սպասողական մօտեցում է: Որոշ ներդրողներ կը վերաիմաստաւորեն իրենց ներդրումները տարածաշրջանային ծիրէն ներս»։
Ինչ կը վերաբերի հայաստանեան տնտեսութեան վիճակին անցած տարուան թաւշեայ յեղափոխութենէն ետք ինկած ժամանակահատուածին, ապա Եուլիա Ուստիւկովան նկատած է, որ անցած երկու տարիներուն Հայաստանի մէջ մաքրօտնտեսական իրավիճակը կայուն էր, ՀՆԱ-ն աճած է, գնաճը զսպուած էր, ելեւմտական դիմադրողականութիւն ցուցաբերած է, վարկերու աճը նպաստած է տնտեսական աշխոյժութեան, հարկային մուտքերը աճած են:
Ըստ Ուստիւկովայի, Հայաստանի կառավարութեան նախաձեռնած հարկային փոփոխութիւններն ի զօրու են աշխոյժութիւն առաջացնելու փոքր ու միջին պիզնեսին մէջ: Ան նշած է՝ գալիք տարուընէ Հայաստանի մէջ հարկային բեռը պիտի վերաբաշխուի:
