Ջերմուկի ուղղութեամբ եղած է սահմաններու ճշգրտում
Ջերմուկի սարերու մօտ ատրպէյճանական զինուորական մեքենաներու կուտակումները եղած են շուրջ երկու շաբաթ առաջ, երբ ատրպէյճանական կողմը հայ-ատրպէյճանական նոր սահմանին մօտեցած է՝ սահմանները ճշտգրտելու եւ դիրքերը ամրապնդելու համար։ Այս մասին NEWS.am-ին յայտնած է Ջերմուկի քաղաքապետ Վարդան Յովհաննիսեանը՝ նշելով, որ այդ օրը ինքը նոյնպէս եղած է սահմանին, բանակցութիւններ ընթացած են երկու կողմերու միջեւ՝ սահմանազատման առնչութեամբ։
«Ոնց որ մերոնք են բարձրացել մեքենաներով, այդպէս էլ իրենք են եկել, ընդ որում իրենց մեքենաները չեն եղել միայն Ջերմուկի ուղղութեամբ դիրքերը պահելու անձնակազմ տեղափոխող, այլ նաեւ յարակից ուղղութիւններով։ Հայկական կողմից եղել են զինուորականներ, բանակցութիւնները վարել ենք ՊԲ համապատասխան սպաները, խորհրդային տարիների գծուած սահմանով սահմանազատում է արուել, մեր բանակն էլ կանգնած է Հայաստանի սահմանին»,- ըսած է քաղաքապետը՝ նշելով, որ Ջերմուկի ուղղութեամբ սահմանը կը պահեն Քարվաճառէն դուրս եկած բանակային ստորաբաժանումները:
Սահմանն այժմ, ըստ քաղաքապետի, 12 քմ հեռու է Ջերմուկ քաղաքէն։ Այդ հատուածին մէջ ատրպէյճանական վերահսկողութեան տակ կ'անցնին կրկին արօտավայրեր, որոնցմէ կ'օգտուին մօտակայ գիւղերու բնակիչները։
Քաղաքապետի խօսքով՝ Ջերմուկի՝ սահմանամերձ դառնալէ ետք քաղաքի առօրեան չէ փոխուած, առողջարանները կ'աշխատին նախկինի պէս։
