Հաղորդագրություն՝ Ռամկավար Ազատական կուսակցության Հանրապետական վարչության

ՌԱԿ Հանրապետական վարչության որոշմամբ Վարչության արտագնա նիստեր են գումարվելու կուսակցության շրջանային բոլոր ակումբներում` նպատակ ունենալով տեղերում հանդիպելու կուսակից ընկերների հետ, փոխադարձ սերտ ծանոթություն հաստատելու Վարչության և ակումբների անդամների միջև, անմիջական շփումներով քննարկումներ ծավալելու ակումբների գործունեության և նրանց ծրագրերի շուրջ:

Առաջին արտագնա նիստը գումարվեց 2024թ. ապրիլի 28-ին Գյումրիի Շիրակի շրջանային գրասենյակում` նախագահությամբ ՌԱԿ ատենապետ ընկեր Հրաչյա Կարապետյանի:

Վարչության անդամները մասնակից եղան Շիրակի շրջանակի «Արագած» ավագների և «Փանոս Թերլեմեզյան» երիտասարդական ակումբների անդամական երկու ժողովներին:

Շիրակի շրջանակի ատենապետ Հովիկ Կարապետյանը անվանական ներկայացրեց Հանրապետական վարչության անդամներին, փոխադարձաբար ակումբների անդամները ներկայացան ՌԱԿ ղեկավար քաղաքական գործադիր մարմնին:

Ընկեր Հրաչյա Կարապետյանը և փոխատենապետ Կարեն Կակոյանը ժողովների ընթացքում ակումբայիններին ներկայացրեցին հանրապետության ներքին և արտաքին քաղաքական արդի իրավիճակը, համաշխարհային և տարածաշրջանային զարգացումները, որոնց շուրջ ՌԱԿ սկզբնական կառույցների անդամները մտքեր փոխանակեցին:

Շեշտելով, որ կուսակցությունը ազգային ավանդական է, «Արագած» ակումբի անդամներից մի քանիսը նկատեցին, որ անհրաժեշտություն է զգացվում կուսակցության ակտիվ կառուցողական քննադատական դիրքորոշում հանրապետության իշխանությունների ներքին և արտաքին քաղաքականության շուրջ. մասնավորապես նկատվում է ազգային արժեքներից հետզհետե հեռացում, Ադրբեջանի հետ սահմանազատման և սահմանագծման գործառույթի ոչ ամբողջական, հատվածաբար իրականացում, որը բերում է ժողովրդի որոշակի զանգվածների դժգոհության, և այլ հարցեր: Նշվեց, որ ՌԱԿ-ը պետականամետ է, որը կշարունակվի առանց կուսակցության սկզբունքներից շեղվելու:

 Քննարկվեցին նաև ներկուսակցական հարցեր, շրջանակի ակումբների խնդիրներն ու  անելիքները, հարց դրվեց ծավալել ավելի ակտիվ գործունեություն, գերակա համարվեց քաղաքական դաշտում ավելի շատ հանդես գալու ուղղվածությունը` մասնակցելով ՏԻՄ ընտրություններին, մարզային և համայնքային քաղաքական կյանքին, ծրագրերին և նախաձեռնություններին:

 Վարչությունը հատուկ կարևորեց երիտասարդական ակումբի գործունեության ընդլայնումը, ուսանող երիտասարդության ներուժի օգտագործումը, նրանց հետաքրքրող նպատակային միջոցառումների հաճախակի կազմակերպումը:

ՀՎ անդամները արձանագրեցին, որ արտագնա նիստը անչափ արդյունավետ էր, շփումները կարևոր էին, ուստի նիստեր կանցկացվեն բոլոր մարզային կառույցներում:

ՌԱԿ Հանրապետական վարչության

մամլո դիվան