«Իշխանութեան հետագայ ճակատագիրը պիտի որոշի միայն ու միայն, բացառապէս ժողովուրդը». ՀՀ վարչապետը հրաժարական տուաւ
ՀՀ վարչապետը ուղիղ եթերով հեռարձակուած իր ուղերձին մէջ նշած է, որ կարեւոր կը համարէ, որ իր ուղերձը տեղի ունենայ հէնց Քաղաքացիի օրը։ Ուղերձին մէջ ըսած է․
«Սիրելի ժողովուրդ՝
Հայաստանի Հանրապետութեան հպարտ քաղաքացիներ,
Արցախի Հանրապետութեան հպարտ քաղաքացիներ,
Սփիւռքի հպարտ հայութիւն
Սոյն թուականի մարտի 18-ին, Հանրապետութեան նախագահի, խորհրդարանական խմբակցութիւնների ղեկավարների հետ քննարկումների արդիւնքներով ես յայտարարեցի 2021 թուականի յունիսի 20-ին Հայաստանում արտահերթ խորհրդարանական ընտրութիւններ անցկացնելու որոշման մասին:
Հայաստանի Հանրապետութեան գործող Սահմանադրութեամբ արտահերթ խորհրդարանական ընտրութիւնների անցկացումը հնարաւոր է միայն այն պարագայում, երբ վարչապետը հրաժարական է տալիս, եւ խորհրդարանը երկու անգամ վարչապետ չի ընտրում: Սրանից յետոյ Ազգային ժողովը իրաւունքի ուժող համարուում է արձակուած, եւ տեղի են ունենում արտահերթ խորհրդարանական ընտրութիւններ:
Յունիսի 20-ին արտահերթ խորհրդարանական ընտրութիւններ անցկացնելու որոշումը կեանքի կոչելու համար այսօր ես հրաժարական եմ տալիս Հայաստանի Հանրապետութեան վարչապետի պաշտօնից:
Սահմանադրութեան ձեւակերպումները ենթադրում են նաեւ, որ Ազգային ժողովը իրաւունքի ուժով արձակուած համարուելու համար անհրաժեշտ է, որ խորհրդարանում վարչապետի ընտրութեան քուէարկութիւն տեղի ունենայ: Այս ընթացակարգերը պահպանելու համար ես երկու անգամ կ'առաջադրուեմ վարչապետի թեկնածու: Ազգային ժողովի միւս խմբակցութիւնները, պատգամաւորները վարչապետի այլ թեկնածու չեն առաջադրի: Խորհրդարանական մեծամասնութիւնը վարչապետ չի ընտրի, եւ Ազգային ժողովը կը համարուի արձակուած, եւ կը նշանակուեն արտահերթ խորհրդարանական ընտրութիւններ:
Այս ընթացքում կը շարունակեմ կատարել Հայաստանի Հանրապետութեան վարչապետի պարտականութիւնները՝ օրէնսդրութեամբ ու Սահմանադրութեամբ նախատեսուած ամբողջ ծաւալով:
Սիրելի հայրենակիցներ,
Յունիսի 20-ին արտահերթ ընտրութիւններ անցկացնելու ժամանակացոյցի առումով ես կարող էի հրաժարական տալ ոչ պարտադիր այսօր: Բայց կարեւոր համարեցի, որ հրաժարականը տեղի ունենայ հէնց այսօր՝ Քաղաքացու օրը: Սա կարեւոր խորհրդանիշն է այն բանի, որ այսպիսով Հայաստանի Հանրապետութեան քաղաքացուց ստացած իշխանութիւնը մենք վերադարձնում ենք քաղաքացուն, որպէսզի նա՝ Հայաստանի Հանրապետութեան քաղաքացին, որոշի իշխանութեան հետագայ ճակատագիրը՝ ազատ, արդար, մրցակցային ընտրութիւններով:
Այսօրուայ ուղերձում չեմ ուզում անդրադառնալ 2018 թուականից ի վեր մեր ունեցած յաջողութիւններին ու ձախողումներին, յաղթանակներին ու պարտութիւններին: Այդ թեմաների մասին բազմիցս խօսել եմ, եւ առաջիկայ նախընտրական շրջանը նման բազմաթիւ առիթներ տալու է:
Այս պահին ուզում եմ եւս մէկ անգամ ընդգծել, թէ ինչու ենք անհրաժեշտ համարում արտահերթ խորհրդարանական ընտրութիւնների անցկացումը:
2020 թուականին մենք անցել ենք աղէտալի իրադարձութիւնների միջով: Կատարուածի պատճառների, հիմքերի, լուծումների մասին արտայայտուել են գրեթէ բոլորը՝ քաղաքական ուժերը, կառավարութեան անդամներ, մտաւորականներ, հոգեւորականներ, հասարակական կազմակերպութիւններ, ոչ ֆորմալ խմբեր:
Միակ սուպյէկթը (ենթական), որը կարծիք արտայայտելու ինստիտուցիոնալ (համակարգային) հնարաւորութիւն չի ունեցել` ժողովուրդն է, եւ ուրեմն՝ ժողովուրդը պէտք է իր խօսքն ասելու, անցեալի ու ներկայի վերաբերեալ գնահատականներ տալու եւ ապագայի վերաբերեալ որոշումներ կայացնելու հնարաւորութիւն ունենայ: Արտահերթ ընտրութիւններն անցկացուում են՝ այդ հնարաւորութիւնն ստեղծելու համար:
2021 թուականին արտահերթ ընտրութիւններ անցկացնելու գաղափարը առաջարկել եմ դեռեւս 2020 թուականի վերջին: Բայց մի շարք ուժերի կողմից այն մերժուում էր, որովհետեւ արտահերթի գաղափարը մերժող այդ շրջանակները համարում էին, թէ իշխանութեան ճակատագիրը պէտք է որոշուի չակերտաւոր էլիտար փակ սենեակներում, եւ ժողովուրդը պէտք է մէկուսացուած լինի այս գործընթացից:
Այդ ուժերը նման մօտեցում ցուցաբերում էին ոչ միայն այն պատճառով, որ հասկանում են, որ Հայաստանում իշխանութեան բարձրագոյն կրողի՝ ժողովրդի կողմից վստահութեան արժանանալու որեւէ հնարաւորութիւն չունեն, այլեւ նրանց քաղաքական հաւատամքն է, որ կազելներով (հանրակառք) ու վարչական լծակներով ընտրատեղամասեր քշուող ժողովուրդը պէտք է ընդամէնը արձանագրի չակերտաւոր էլիտայի կողմից կայացուած որոշումները:
Մեր հաւատամքը, սակայն, բոլորովին այլ է. ժողովրդի ազատ կամարտայայտութիւնը իշխանութեան եւ ինքնիշխանութեան միակ աղբիւրն է, եւ իշխանութեան հետագայ ճակատագիրը պիտի որոշի միայն ու միայն, բացառապէս ժողովուրդը, եւ ինձ համարում եմ այս հնարաւորութեան եւ իրաւունքի երաշխաւորը:
Ուզում եմ ընդգծել, որ մեր՝ «Քաղաքացիական պայմանագիր» կուսակցութիւնը մասնակցելու է արտահերթ խորհրդարանական ընտրութիւններին, ես հանդէս եմ գալու որպէս վարչապետի թեկնածու, եւ մենք հնազանդօրէն կ'ենթարկուենք ժողովրդի կայացրած որոշումներին եւ անմնացորդ կը կատարենք մեր պարտականութիւնները ժողովրդի առաջ:
Եթէ ժողովուրդը որոշի, որ ես պէտք է հեռանամ վարչապետի պաշտօնից, ես կը կատարեմ այդ որոշումը, եթէ ժողովուրդը որոշի, որ պիտի շարունակեմ պաշտօնավարել որպէս վարչապետ, ես կը կատարեմ այդ որոշումը:
Եզրափակելով խօսքս՝ ուզում եմ եւս մէկ անգամ խոնարհումի խօսքեր ասել 44-օրեայ պատերազմում ընկած մեր բոլոր եղբայրներին ու քոյրերին, նրանց ընտանիքի անդամներին: Զօրակցութիւն յայտնել անհետ կորած համարուող մեր բոլոր հայրենակիցների ընտանիքներին, համբերութիւն ու տոկունութիւն մաղթել գերեվարուած մեր բոլոր հայրենակիցներին եւ նրանց հարազատներին եւ ասել՝ մեր գերեվարուած հայրենակիցներն անպայմանօրէն վերադառնալու են, եւ մենք պիտի ուժ եւ կորով ունենանք նրանց վերադարձը ապահովելու համար:
Սիրելի ժողովուրդ,
Հայաստանի Հանրապետութեան հպարտ քաղաքացիներ,
Արցախի հանրապետութեան հպարտ քաղաքացիներ,
Սփիւռքի հպարտ հայութիւն
Ոչ մի րոպէ չկասկածէք, իմացէք, վստահ եղէք՝
Հայաստանում եւ Արցախում ապագայ կայ, կայ ապագայ, եւ այդ ապագայի կերտումը սկսուում է այսօր:
Եւս մէկ անգամ խոնարհելով մեր բոլոր նահատակների առաջ՝ բոլորիս շնորհաւորում եմ Քաղաքացու օրուայ առիթով։
Եւ ուրեմն,
Կեցցէ Ազատութիւնը,
Կեցցէ Հայաստանի Հանրապետութիւնը,
Կեցցէ Արցախը,
Եւ կեցցենք մենք եւ մեր երեխաները, որ ապրելու ենք Ազատ ու Երջանիկ Հայաստանում, Ազատ ու Երջանիկ Արցախում»:
