Ակնածանքի խօսքեր կը յղեմ մեր կանանց, որոնց հերոս զաւակները, ամուսինները արցախեան պատերազմին ինկան հերոսաբար. Նիկոլ Փաշինեան
ՀՀ վարչապետ Նիկոլ Փաշինեան շնորհաւորական ուղերձ յղած է Մարտի 8-ի առիթով:
«Այս տօնը մեր հանրութեան շրջանում նշուում է առանձնակի ջերմութեամբ, մեծարանքով, ինչը վկայում է մեր հանրութեան մէջ կանանց առանձնայատուկ դերի եւ ունեցած անգնահատելի ներդրման մասին, ինչը նաեւ ձեր ամուսինների, եղբայրների, հայրերի եւ որդիների կողմից ձեր նկատմամբ ունեցած յարգանքի ու անսահման սիրոյ արդիւնք է:
Առանձնայատուկ ցանկանում եմ գլուխ խոնարհել մեր զինծառայող եւ կամաւոր կանանց յիշատակի առաջ, ովքեր 44-օրեայ պատերազմի ընթացքում իրենց կեանքը զոհեցին յանուն հայրենիքի:
Ակնածանքի խօսքեր եմ յղում մեր այն կանանց, որոնց հերոս զաւակները, ամուսիններն ու եղբայրներն արցախեան պատերազմում ընկան հերոսաբար:
Ջերմօրէն շնորհաւորում եմ նաեւ այն կանանց, որոնց որդիները, ամուսիններն ու եղբայրներն այսօր էլ կանգնած են սահմաններին ու շարունակում են իրենց հայրենանուէր ծառայութիւնը, ու նաեւ այն կանանց, որոնք հենց իրենք են կանգնած եղել կամ այսօր էլ կանգնած են հայրենիքի պաշտպանութեան առաջնագծում:
Հայրենիքի պաշտպանութեան գործում ձեր, ձեր որդիների, ամուսինների ու եղբայրների ցուցաբերած քաջութիւնն ու հայրենասիրութիւնն օրինակ կը լինեն հետագայ բոլոր սերունդների համար»,- ըսուած է ուղերձին մէջ:
Կանանց իրաւունքների պաշտպանութեան օրուայ առթիւ վարչապետը կարեւոր համարած է արձանագրել, որ մեր երկրին մէջ դեռ շատ ընելիքներ կան կանանց դերի բարձրացման, հաւասար իրաւունքներու եւ հաւասար հնարաւորութիւններու ապահովման համար.
«Պէտք է նաեւ արձանագրել, որ պետութիւնը ջանքեր է գործադրում այդ ուղղութեամբ: Մեր խնդիրն է ստեղծել այնպիսի հնարաւորութիւններ, որոնք ձեզ թոյլ կը տան դրսեւորել բոլոր ձեր ստեղծարար կարողութիւնները, գիտելիքները, զգալ ձեզ առաւելագոյնս պաշտպանուած ու գնահատուած:
Ձեր շնորհիւ են նաեւ պահպանւում մեր ազգային լաւագոյն աւանդոյթները, ամուր հայկական ընտանիքը: Ձեր նուիրուածութեան եւ մեծ ուժի արդիւնքում է, որ կարողանում էք մեր ազգի համար դաստիարակել կիրթ ու հայրենասէր սերունդներ»:
