Արայիկ Յարութիւնեանը ուղերձ յղած է Նիկոլ Փաշինեանին՝ յաջողութիւն մաղթելով ստացած վստահութեան իրացման ճանապարհին
Արցախի Հանրապետութեան նախագահ Արայիկ Յարութիւնեանը ուղերձ յղած է Հայաստանի Հանրապետութեան վարչապետի պաշտօնակատար Նիկոլ Փաշինեանին՝ կայացած արտահերթ խորհրդարանական ընտրութիւններու առթիւ: Ուղերձին մէջ, մասնաւորապէս, ըսուած է.
«Յարգելի՛ պարոն Փաշինեան,
Ատրպէյճանա-թուրքական 44-օրեայ ռազմական ագրեսիայից (յարձակում) յետոյ Հայաստանի Հանրապետութեան ներքաղաքական անկայուն իրավիճակի տրամաբանական յանգուցալուծումը եղաւ արտահերթ ընտրութիւնների անցկացումը: Ուրախ եմ, որ Հայաստանի Հանրապետութեան պետական մարմիններին ու ժողովրդին յաջողուել է կազմակերպել ժողովրդավարական ընտրութիւններ՝ չնայած բազմաթիւ արտաքին ու ներքին դժուարութիւններին ու մարտահրաւէրներին:
Հաշուի առնելով ընտրութիւնների նախնական արդիւնքները՝ յաջողութիւններ եմ մաղթում Ձեզ եւ Ձեր գլխաւորած թիմին՝ ընտրողների մեծամասնութեան կողմից ստացած վստահութեան իրացման ճանապարհին: Յոյսով եմ՝ ընտրութիւնների արդիւնքները հնարաւորութիւն կը տան Հայաստանի Հանրապետութեան իշխանութիւններին ամրացնել պատերազմի հետեւանքով խարխլուած անվտանգային ու արտաքին քաղաքական դիրքերը, վերականգնել հանրային համերաշխութիւնը համազգային հիմնախնդիրների լուծման հարցերում, ինչպէս նաեւ հետեւողական ու արդիւնաւէտ աշխատանք տանել արցախահայութեան իրաւունքների պաշտպանութեան, պատերազմի հետեւանքների վերացման եւ Արցախի Հանրապետութեան միջազգային ճանաչման ուղղութեամբ:
Յաջողութիւն եմ մաղթում նաեւ ժողովրդի որոշակի վստահութեան արժանացած միւս քաղաքական ուժերին: Համոզուած եմ՝ ստացած իւրաքանչիւր քուէ պէտք է ծառայեցուի համազգային շահերին ու իղձերին՝ կայուն, կառուցողական ու յարգալից քաղաքական միջավայրում: Պատերազմի հետեւանքներն ու առկայ մարտահրաւէրները մեզ այլ ուղի չեն թողնում, քան դէմ յանդիման կանգնել դրանց եւ միասնական ջանքերով Արցախի եւ Հայաստանի Հանրապետութիւնները դարձնել աւելի անվտանգ ու բարեկեցիկ հայրենիք մեր ժողովրդի համար՝ յանուն մեր գալիք սերունդների ու Հայոց Հայրենիքի հարատեւման»:
