Արցախի խորհրդարանական խմբակցութիւնները դատապարտեցին Շուշի կատարուած այցը
Արցախի Հանրապետութեան Ազգային Ժողովի խմբակցութիւնները յայտարարութիւն տարածած են 2021-ի 10 յուլիսին Պաքուի մէջ հաւատարմագրուած օտարերկրեայ դիւանագիտական առաքելութիւններու ներկայացուցիչներու՝ Արցախի բռնագրաւուած տարածքներ այցելութեան կապակցութեամբ։ Յայտարարութիւնը կը ներկայացնենք ստորեւ։
«Արցախի Հանրապետութեան դէմ Ատրպէյճանի սանձազերծած լայնամաշտապ պատերազմից յետոյ միջազգային իրաւունքի եւ, մասնաւորապէս, միջազգային հումանիտար (մարդասիրական) իրաւունքի ոտնահարմամբ շարունակւում են թշնամական գործողութիւնները հայկական պատմական, մշակութային եւ հոգեւոր արժէքների հանդէպ: Եւ այս ամէնը ոչ միայն չի դատապարտւում միջազգային կառոյցների եւ առանձին երկրների կողմից, այլեւ կատարւում է հակառակը. պաշտօնական Պաքուն ոչ մի ջանք չի խնայում այդ նոյն կառոյցների ու երկրների ներկայացուցիչներին մասնակից եւ յանցակից դարձնել իր զաւթողական ու հակամարդկային գործողութիւններին:
Այս խորապատկերի վրայ պէտք է դիտարկել նաեւ 2021 թուականի յուլիսի 10-ին ատրպէյճանական իշխանութիւնների կողմից Պաքւում հաւատարմագրուած օտարերկրեայ դիւանագիտական առաքելութիւնների ներկայացուցիչների այցի կազմակերպումը Արցախի Հանրապետութեան օկուպացուած (բռնագրաւուած) տարածքներ, այդ թւում՝ բեմականացուած նկարահանումները Շուշիում:
Խստօրէն դատապարտում ենք նմանօրինակ գործելաոճը: Դրանով Ատրպէյճանը փորձում է Արցախի Հանրապետութեան նկատմամբ ագրեսիվ (յարձակողական) զաւթողական ծրագրի իրագործման աջակիցների շրջանակ ձեւաւորել: 44-օրեայ պատերազմի ընթացքում Ատրպէյճանը Թուրքիայի եւ միջազգային ահաբեկչական խմբաւորումների աջակցութեամբ զաւթել է Արցախի Հանրապետութեան մեծ մասը, այդ թւում նաեւ հայ ժողովրդի մշակութային եւ հոգեւոր կենտրոն Շուշի քաղաքը:
Միջազգային հանրութեան կողմից Թուրքիայի նախագահի՝ Շուշի այցելութիւնը չդատապարտելը Ատրպէյճանի իշխանութիւններին մղեց նոր սադրիչ գործողութիւնների, որին հետեւեց Պաքւում հաւատարմագրուած օտարերկրեայ դիւանագէտների այցը Շուշի: Պատմական իրողութիւնների այսկերպ աղաւաղումը եւ նման մեթոտներով հակամարտութեան էութեան խեղաթիւրումը համարում ենք հակամարտութեան խաղաղ կարգաւորման խաթարմանն ուղղուած քայլ, որը կոպտօրէն ոտնահարում է միջազգային իրաւունքի հիմնարար սկզբունքները:
Գնահատելով ԵԱՀԿ Մինսքի խմբի համանախագահ երկրների մերժողական կեցուածքն այդ բեմադրութեան նկատմամբ՝ կոչ ենք անում դատապարտել նմանօրինակ սադրիչ գործողութիւնները եւ քայլեր ձեռնարկել Արցախի Հանրապետութեան տարածքների դեօկուպացիայի ( ապաբռնագրաւում) եւ Արցախի բնակչութեան ազատ ապրելու իրաւունքի ամրագրման ուղղութեամբ»:
«Ազատ Հայրենիք–Քմդ» Խմբակցութիւն
«Միասնական Հայրենիք» Խմբակցութիւն
«Արդարութիւն» Խմբակցութիւն
«Հայ Յեղափոխական Դաշնակցութիւն» Խմբակցութիւն
«Արցախի Ժողովրդավարական Կուսակցութիւն» Խմբակցութիւն
