Արցախի մէջ յարգանքի տուրք մատուցած են Սումկայիթի զոհերու յիշատակին
Ատրպէյճանի կողմէ կազմակերպուած ջարդերու զոհերու յիշատակին եւ բռնագաղթուած հայ բնակչութեան իրաւունքներու պաշտպանութեան օրուան առթիւ Արցախի Հանրապետութեան նախագահ Արայիկ Յարութիւնեան 28 փետրուարին այցելած է Ստեփանակերտի քաղաքային յուշահամալիր, յարգանքի տուրք մատուցած եւ ծաղկեպսակ դրած ատրպէյճանական իշխանութիւններու կազմակերպած կոտորածներուն զոհ դարձած հայերու յիշատակը յաւերժացնող յուշաքարին մօտ:
Արայիկ Յարութիւնեանի հետ յուշահամալիր այցելած են նաեւ Ազգային ժողովի նախագահ Արթուր Թովմասեան, Հայ առաքելական եկեղեցւոյ Արցախի թեմի առաջնորդ Վրթանէս եպիսկոպոս Աբրահամեան, օրէնսդիր եւ գործադիր մարմիններու ներկայացուցիչներ, անվտանգութեան խորհուրդի անդամներ:
Այնուհետեւ, Հայ առաքելական եկեղեցւոյ Արցախի թեմի առաջնորդ Վրթանէս եպիսկոպոս Աբրահամեանի հանդիսապետութեամբ ոճրագործութեան զոհերու յիշատակին նուիրուած հոգեհանգստեան կարգ կատարուած է:
