Գիտութիւններու Ազգային Ակադեմիայի նախագահ ընտրուած է Աշոտ Սաղեանը
28 Յունիսին ՀՀ ԳԱԱ-ի մէջ տեղի ունեցան ՀՀ ԳԱԱ նախագահի, փոխնախագահի եւ ակադեմիկոս քարտուղարի ընտրութիւններ: ՀՀ ԳԱԱ նախագահի պաշտօնին ընտրուեցաւ ՀՀ ԳԱԱ «Հայկենսատեխնոլոգիա» գիտաարտադրական կեդրոնի տնօրէն, ակադեմիկոս՝ Աշոտ Սաղեան: Այս մասին տեղեկացուց Ակադեմիայի մամլոյ ծառայութիւնը:
ՀՀ ԳԱԱ նախագահի պաշտօնին առաջադրուեցաւ 3 թեկնածու՝ ԳԱԱ մաթեմատիկական եւ տեխնիկական գիտութիւններու բաժանմունքի ակադեմիկոս-քարտուղար, ակադեմիկոս՝ Լենսեր Աղալովեան, ՀՀ ԳԱԱ «Հայկենսատեխնոլոգիա» գիտաարտադրական կեդրոնի տնօրէն, ակադեմիկոս՝ Աշոտ Սաղեան եւ ակադեմիկոս՝ Էտուարտ Ղազարեան: Առաջին փուլին որեւէ մէկ թեկնածու բաւարար ձայն չհաւաքեց: Երկրորդ փուլին՝ 55 կողմ, 34 դէմ, 5 անվաւեր ձայներու յարաբերակցութեամբ ՀՀ ԳԱԱ նախագահի պաշտօնին ընտրուեցաւ ակադեմիկոս՝ Աշոտ Սաղեան:
ՀՀ ԳԱԱ նորընտիր նախագահ՝ Աշոտ Սաղեան ՀՀ ԳԱԱ փոխնախագահի պաշտօնին առաջադրեց ՀՀ ԳԱԱ թղթակից անդամ՝ Հրանդ Մաթեւոսեանի թեկնածութիւնը, իսկ ՀՀ ԳԱԱ ակադեմիկոս քարտուղարի պաշտօնին առաջադրեց ՀՀ ԳԱԱ թղթակից անդամ Արթուր Իշխանեանի թեկնածութիւնը, որոնք փակ, գաղտնի քուէարկութեամբ՝ 80 կողմ, 12 դէմ ձայներու յարաբերակցութեամբ ընտրուեցան:
Յունիս 29-ին ՀՀ ԳԱԱ-ին մէջ տեղի կ'ունենան ՀՀ ԳԱԱ բաժանմունքներու ակադեմիկոս քարտուղարներու ընտրութիւնները:
