ԵԱՀԿ գործող նախագահը կոչ ըրած է Հայաստանին եւ Ատրպէյճանին վերադառնալու քաղաքական երկխօսութեան

2022-01-12

ԵԱՀԿ գործող նախագահ Զպիկնեւ Ռաուն մտահոգութիւն յայտնած է Հայաստանի եւ Ատրպէյճանի սահմանին վերսկսած բախումներուն եւ անոնց հետեւանքով արձանագրուած զոհերուն առնչութեամբ:

«Մենք կոչ կ՝ընենք զերծ մնալու ուժի կիրառումէն եւ շարունակելու վերջերս նախաձեռնած իմաստալից քաղաքական երկխօսութիւնը: Իբրեւ ԵԱՀԿ-ի մէջ նախագահող՝ Լեհաստանը յանձնառու է աշխատելու գործընկերներուն հետ՝ վերսկսելու եւ ամրապնդելու ջանքերը՝ ուղղուած տեւական խաղաղութեան հաստատման ու տարածաշրջանին մէջ կայուն զարգացման խթանման։

Մենք այս հարցով կ՝աջակցինք ԵԱՀԿ Մինսկի խումբի ջանքերուն: Մենք նաեւ կը վերահաստատենք մեր ամուր աջակցութիւնը Լեհաստանի նախագահած ԵԱՀԿ գործող նախագահի անձնական ներկայացուցիչ Անճէյ Գասպրշիկի շարունակական աշխատանքին»,- նշուած է ԵԱՀԿ յայտարարութեան մէջ: