ԵՄ-ն ազնիւ միջնորդ է. Ատրպէյճանի եւ Հայաստանի բարձրաստիճան պաշտօնեաներու պիտի հանդիպին Պրիւքսէլի մէջ. Ալիեւ

2022-04-29

Ատրպէյճանի եւ Հայաստանի բարձրաստիճան պաշտօնեաներու յաջորդ հանդիպումը կը նախատեսուի կայացնել Մայիսին Պրիւքսէլի մէջ: Այս մասին յայտարարած է Ատրպէյճանի նախագահ Իլհամ Ալիեւը «Հարաւային Կովկաս. զարգացում եւ համագործակցութիւն» միջազգային համաժողովի մասնակիցներու հետ հանդիպման ժամանակ:

Երկրի ղեկավարը նշած է Եւրոմիութեան, մասնաւորապէս Եւրոպական խորհուրդի նախագահ Շառլ Միշէլի աշխոյժ դերը Ատրպէյճանի եւ Հայաստանի միջեւ յարաբերութիւններու կարգաւորման գործին մէջ` յիշեցնելով, որ ԵՄ նախաձեռնութեամբ արդէն կայացած է 2 եռակողմ հանդիպում:

«Մենք նաեւ հեռախօսազրոյցներ կ'ունենանք: Կը նախատեսուի Մայիսի սկիզբը կրկին կայացնել Ատրպէյճանի եւ Հայաստանի ներկայացուցիչներու հանդիպումը Պրիւքսէլի մէջ», ըսած է Ատրպէյճանի նախագահը:

Ան ընդգծած է, որ Պաքուն բարձր կը գնահատէ ԵՄ դերը Հայաստանի եւ Ատրպէյճանի միջեւ յարաբերութիւններու յետհակամարտութեան կարգաւորման գործին մէջ:

«Մենք Եմ-ն կը համարենք ազնիւ միջնորդ եւ կ'ողջունենք անոնց ջանքերը: Եթէ Մինսքի խումբը այժմ չի գործեր, մենք կը կարծենք, որ ԵՄ-ն կրնայ իր դերը կատարել կարգաւորման գործընթացին մէջ», ըսած է Ալիեւ:

«Մենք կը սատարենք անոր եւ արդէն կը տեսնենք մեր աշխատանքին պտուղները… Պրիւքսէլը դարձած է իմ հիմնական այցելութիւններուս վայրը», յաւելած է ան: