Հետագայ բանակցային գործընթացի առանցքը պիտի կազմէ «անջատում յանուն փրկութեան» սկզբունքի իրագործումը. Ն. Փաշինեան
Ազգային ժողովին մէջ ՀՀ կառավարութեան ծրագրի 2020 թուականի կատարման ընթացքի եւ արդիւնքներու մասին ելոյթի ընթացքին ՀՀ վարչապետը խօսած է Լեռնային Ղարաբաղի ինքնավար մարզի տարածքի ապագրաւման խնդրի մասին:
«Ուզում եմ ընդգծել, որ մենք որպէս քաղաքական հարց, բանակցային հարց պէտք է դնենք Լեռնային Ղարաբաղի ինքնավար մարզի տարածքի տեօքուփացիայի (ապագրաւման) խնդիրը: Բայց էլի եմ ասում՝ մենք սա պիտի ձեւակերպենք ոչ թէ որպէս ռազմական հարց, այլ որպէս բանակցային քաղաքական հարց»,-ըսած է ՀՀ վարչապետը:
Հետագայ բանակցային գործընթացի առանցքը պիտի կազմէ «անջատում յանուն փրկութեան» սկզբունքի իրագործումը. «Դուք տեսաք, թէ երէկ կամ նախօրէին ինչ իրադարձութիւններ տեղի ունեցան Ատրպէյճանում, դա ուղղակի աներեւակայելի մի բան է, եւ կարծում եմ, որ մենք բոլոր ամպիոններից, բոլոր հնարաւոր տեղերից պէտք է հրաւիրենք բոլորի ուշադրութիւնը, որ կարող է պատերազմի տառապանքների եւ զոհերի թանգարան բացուել մի երկրում, ինչը հայատեացութեան, ատելութեան ամենամեծ դրսեւորումն է: Եւ սա ամենամեծ հիմքն է, որ մենք միջազգային հանրութեանը ի ցոյց դնենք Լեռնային Ղարաբաղի համար «անջատում յանուն փրկութեան» սկզբունքի կիրառելիութիւնը, որը մեր հետագայ բանակցային գործընթացի առանցքը պիտի կազմի»,- ըսած է Փաշինեանը:
