Մարտ 5-ի ահաբեկչութեամբ Ատրպէյճանը մի քանի նպատակ կը հետապնդէ․ Փաշինեան
5 մարտի ահաբեկչութեամբ Ատրպէյճանը քանի մը նպատակ կը հետապնդէր: Այս մասին այսօր՝ 9 մարտին, կառավարութեան նիստին յայտարարած է ՀՀ վարչապետ Նիկոլ Փաշինեան:
Ան նաեւ աւելցուցած է. «Առաջինը ԼՂ ներկայացուցիչների հետ հետագայ բանակցութիւնների վիժեցումը եւ նոր ռազմական սադրանքի համար անհրաժեշտ ֆոն ստեղծելն է: ԼՂ ԱԳՆ-ն երէկ հանդէս է եկել յայտարարութեամբ՝ արտայայտելով պատրաստակամութիւնն շարունակելու խօսակցութիւնը Ադրբեջանի հետ եւ սա չափազանց կարեւոր յայտարարութիւն է:
Կարծում եմ՝ անհրաժեշտ է միջազգային յուսալի մեխանիզմներ ստեղծել, որ Բաքու-Ստեփանակերտ անխափան, ինստիտուցիոնալ (համակարգային) խօսակցութիւն տեղի ունենայ եւ սա վերը յիշատակուած միջազգային պայմանաւորուածութեան իրացման արդիւնաւէտ երաշխիք կարող է դառնալ:
Մարտի 5-ի սադրանքի յաջորդ նպատակն էր ստեղծել կեղծ ապացոյցներ, թէ Հայաստանից ԼՂ զէնք, զինամթերք է տեղափոխւում: Այս թեման Ադրբեջանի համար կարեւոր է յատկապէս Արդարադատութեան միջազգային դատարանի փետրուարի 22-ի որոշումից յետոյ, երբ դատարանը միանշանակ ու աներկբայ մերժեց Հայաստանի նկատմամբ ժամանակաւոր կիրառելու Ադրբեջանի պահանջը, որով Ադրբեջանը ՀՀ-ին մեղադրում էր ականապատումներ իրականացնելու մէջ: Այդ մերժմամբ արդէն մի քանի ամիս միջազգային հարթակներում Հայաստանի դէմ ծաւալուող անհիմն մեղադրանքները ականապատումների մասին փլուզուեցին: Սա չափազանց կարեւոր էր:
Եւ ահա Ադրբեջանը մարտի 5-ի միջադէպը փորձ էր անում ներկայացնել որպէս ՀՀ-ից ԼՂ զէնք, զինամթերք տեղափոխելու ապացոյց, ինչը չստացուեց երկու պատճառով: Նախ, ոստիկանութեան ՈՒԱԶ-ը (ինքնաշարժի մակնիշ) ոչ թէ գնում էր դէպի Ստեփանակերտ, այլ Ստեփանակերտից էր դուրս եկել, երկրորդ, Ադրբեջանի յարձակումը եւ նաեւ ՈՒԱԶ-ի հետագիծը Ստեփանակերտից մինչեւ դէպքի վայր, նկարահանուել էր ԼՂ ՆԳ նախարարութեան տեսախիցիկների կողմից, ինչից ակնյայտ էր դառնում, որ ոստիկանական աւտոմեքենայում բացի փաստաթղթերից ու տաբելային զէնքերից, որեւէ այլ բան չի եղել»:
Ատրպէյճանի յաջորդ կարեւոր նպատակը, ըստ Փաշինեանի, հետեւեալն էր. արիւնոտ ահաբեկչութեամբ ձեւաւորել նոր խօսոյթներ, տեղեկատուական նորանոր հոսքեր, որոնք կը ծածկեն կարեւորագոյն փաստ մը, այն, որ Ատրպէյճանը բացայայտ կերպով չի կատարեր միջազգային դատական ատեանի՝ Արդարադատութեան միջազգային դատարանի որոշումը Լաչինի միջանցքը բանալու վերաբերեալ:
«Յիշեցնեմ, որ պարտադիր իրաւական ուժ ունեցող որոշմամբ դատարանն Ադրբեջանին պարտադրել է ձեռնարկել իրեն հասու բոլոր միջոցները երաշխաւորելու Լաչինի միջանցքով քաղաքացիների, տրանսպորտային (փոխադրային) միջոցների ու բեռների երկու ուղղութիւններով անխափան տեղաշարժը: Եւ ահա այս որոշումը 15 օր շարունակ չի կատարւում, եւ սա բացառապէս Ադրբեջանի պատասխանատւութիւնն է: Դեռ հակառակը, Ադրբեջանը գնում է նորանոր սադրանքների իրադրութիւնը ԼՂ-ում էլ աւելի սրելու համար:
Այս ամէնի ընդգծումով աւելի ու աւելի հրատապ է դառնում ԼՂ եւ Լաչինի միջանցք անյապաղ միջազգային փաստահաւաք առաքելութեան գործուղման անհրաժեշտութիւնը՝ կանխելու համար Ադրբեջանի կողմից նոր ագրեսիայի (յարձակում) սանձազերծումը եւ ԼՂ-ի ժողովրդին էթնիկ (ցեղային) զտումների ու ցեղասպանութեան ենթարկելու Ադրբեջանի ակնյայտ նախապատրաստութիւնները, որոնք արտայայտւում են միջազգային դատարանների որոշումները չկատարելով, Լաչինի միջանցքը փակ պահելով, ռազմական սադրանքներ եւ ահաբեկչական գործողութիւններ ձեռնարկելով»,-յայտարարած է Փաշինեան:
Ան նաեւ վերահաստատած է Հայաստանի տարածաշրջանին մէջ խաղաղութեան հասնելու ձգտումը եւ հաւատարմութիւնը խաղաղութեան օրակարգին:
