Մենք տարածքներ նուաճելու որեւէ մտադրութիւն չունինք. Նիկոլ Փաշինեան

Մեզի համար միանշանակ ընդունելի է նաեւ սադրիչ գործողութիւններէն եւ յայտարարութիւններէն զերծ մնալու համանախագահներու կոչը։ Այս մասին 12 Օօգոստոսին, Կառավարութեան հերթական նիստի մեկնարկին յայտարարած է ՀՀ վարչապետ Նիկոլ Փաշինեանը։

«Յուլիսի 29-ին Կառավարութեան նիստում ես ուրուագծել եմ Հայաստանի Հանրապետութեան կառավարութեան պատկերացումը մեր  տարածաշրջանում իրավիճակի դեէսկալացիայի (ապաթէժացման), երկարատեւ կայունութեան եւ խաղաղութիւն հաստատելու քայլերի մասին, ինչպէս նաեւ ընդգծել եմ միջազգային գործընկերների հետ այդ ուղղութեամբ աշխատելու ՀՀ-ի պատրաստակամութիւնը։ Յուլիսի 29-ին ԵԱՀԿ Մինսքի խմբի համանախագահները նոյնպէս հանդէս եկան յայտարարութեամբ, որի առանցքային ուղերձը հայ-ադրբեջանական սահմանի երկայնքով լարուածութեան նուազմանն ուղղուած քայլերի ձեռնարկումն էր, սադրիչ քայլերից եւ յայտարարութիւններից զերծ մնալու Ադրբեջանին եւ Հայաստանին ուղղուած կոչը։ ՀՀ ԱԳՆ-ն Յուլիսի 30-ին հանդէս եկաւ յայտարարութեամբ, որով ողջունեց համանախագահողների յայտարարութիւնը, այդպիսով արտայայտելով ԵԱՀԿ  Մինսքի խմբի համանախագահութեան հովանու ներքոյ խաղաղ բանակցութիւնները վերսկսելու Հայաստանի Հանրապետութեան յանձնառութիւնը։ Մեզ համար միանշանակ ընդունելի է նաեւ սադրիչ գործողութիւններից եւ յայտարարութիւններից զերծ մնալու համանախագահների կոչը։ Ակնյայտ է, որ  այս պայմանի պահպանումն առանցքային նշանակութիւն ունի պատեհ բանակցային մթնոլորտ եւ միջավայր ձեւաւորելու համար։ Եթէ սադրիչ յայտարարութիւնների հետագծելիութեան հարցը մեծ բարդութիւն չի ներկայացնում, սադրիչ գործողութիւնների եւ հրադադարի ռեժիմի խախտումներ նախաձեռնող կողմի հարցը մշապէս բանավէճերի տեղիք է տալիս»,- ըսած է Փաշինեանը։

Ըստ անոր՝ հրադադարի ռեժիմի խախտումներ նախաձեռնող կողմի նոյնականացումը եւ այդ սադրիչ գործողութիւններու հասցէական դատապարտումը էական նշանակութիւն ունի իրադրութեան հետագայ ապաթէժացման եւ կայունացման համար. «Դժուար է պատկերացնել առանց միջազգային մոնիտորինգի (վերահսկողութեան) մեխանիզմի գործարկման։ Ասել եմ, որ կարծում եմ՝ դա պիտի լինի ՀԱՊԿ-ի դիտորդական առաքելութիւն, եթէ դա ՀԱՊԿ-ի համար ընդունելի չէ, այլընտրանքը մնում է ԵԱՀԿ Մինսքի խմբի համանախագահութեան դիտորդական առաքելութիւնը»։

Վերադառնալով Ատրպէյճանի հետ խաղաղ բանակցութիւնները վերսկսելու ԵԱՀԿ Մինսքի խումբի համանախագահութեան կոչին՝ Փաշինեանն ընդգծած է, որ Հայաստանը պատրաստ է բանակցային գործընթացին մէջ ներգրաւուելու թէ բարձր, թէ բարձրագոյն մակարդակով. «Մենք սպասում ենք կոնկրետ առաջարկների։ Հայաստանի, Արցախի եւ տարածաշրջանի համար խաղաղ զարգացման դարաշրջան բացելու մեր ժողովրդից ստացած մանդատը կառավարութեան վրայ դնում է յատուկ պատասխանատուութիւն։ Այս խնդիրը լուծելու համար պէտք է լինենք առաւելագոյնս ակտիւ (աշխոյժ) եւ ճկուն։ Մեր տրամադրութիւնն ու տրամադրուածութիւնը պիտի լինի հետեւեալը՝ առաւելագոյնն անել՝ օրակարգում առկայ խնդիրներով լուծումների գնալու համար։ Ի հարկէ կան հարցեր, որոնք հնարաւոր է լուծել աւելի արագ։ Կան հարցեր, որոնց լուծումն աւելի երկար ժամանակ է պահանջում։ Նման հարցերից մէկը, որը կարծում եմ՝ հնարաւոր է բաւական արագ լուծել, տարածաշրջանային կոմունիկացիաների (հաղորդակցութիւններուն) բացումն է, տարածաշրջանային ապաշրջափակման օրակարգը, կարծում եմ՝ օր առաջ պէտք է սկսենք աշխատանքները փոխվարչապետերի եռակողմ ձեւաչափում, լինենք առաւել ակտիւ եւ նախաձեռնող տարածաշրջանում նոր կոմունիկացիոն եւ տնտեսական հնարաւորութիւնների իրագործման տեսանկիւնից»։

Նիկոլ Փաշինեանն ըսած է, որ հայ-ատրպեճանական սահմանի սահմանազատման եւ սահմանագծման վերաբերեալ իրենց դիրքորոշումն ամփոփոխ է. «Կարծում ենք՝ այդ ուղղութեամբ նոյնպէս պէտք է ակտիւանան (աշխոյժանան) աշխատանքները»։

Վարչապետը նշած է, որ թշնամութեան եւ թշնամանքի մթոնոլորտի հետագայ խորացում մեր տարածաշրջանին մէջ անթոյլատրելի է. «Դա սպառնալիք է ոչ միայն մեր տարածաշրջանի, այլեւ միջազգային անվտանգութեան համար։ Թէ թշնամութեան մթոնոլորտի խորացումն ինչպիսի դրսեւորումների կարող է բերել, տեսանք Պաքուում բացուած պուրակի օրինակով, որն անարգանք է մեր տարածաշրջանի եւ տարածաշրջանային քաղաքակրթութեան հասցէին։ Սահմանակից երկրների հետ յարաբերութիւնների խորացումը կամ կարգաւորումը կառավարութեան արտաքին քաղաքականութեան կարեւոր ուղղութիւններից է լինելու։ Ցաւօք, որոշ ուժեր փորձում են սխալ լոյսի ներքոյ ներկայացնել Հայաստանի մտադրութիւնները, ասելով, թէ ՀՀ-ն ԶՈՒ-երի բարեփոխումներն առաջնահերթութիւն է հռչակել սահմանակից երկրների նկատմամբ ագրեսիւ (յարձակողական) քաղաքականութիւն վարելու համատեքստում։ Հայաստանի Հանրապետութիւնը, ինչպէս ցանկացած խաղաղասէր պետութիւն, ԶՈՒ-երը զարգացնելու եւ վերափոխելու է ոչ թէ ագրեսիայի, այլ հնարաւոր ագրեսիայից պաշտպանուելու համար, մենք տարածքներ նուաճելու որեւէ մտադրութիւն չունենք, մեր մտադրութիւնը մեր ինքնիշխանութիւնը եւ տարածքային ամբողջականութիւնը պաշտպանելն է»։