Մեր բոլոր ծրագրերուն հիմքը մարդն է. Մասիս Մայիլեան եւ «Նոր Արցախ»ը քարոզարշաւը կը շարունակեն Մարտունիի մէջ
Արցախի Հանրապետութեան ԱԳ նախարար, նախագահի թեկնածու Մասիս Մայիլեան, «Նոր Արցախ» դաշինքի անդամները մեկնարկած քարոզարշաւի շրջածիրէն ներս, 3 Մարտին այցելած են Մարտունի շրջանի Քերթ, Քարահունջ եւ Կոլխոզաշէն համայնքներ, ուր հանդիպումներ ունեցած են հասարակութեան հետ եւ ներկայացուցած նախընտրական ծրագիրը:
«Նոր Արցախ» դաշինքի անդամներու շարքին ներկայ էր նաեւ ՌԱԿ-ի ներկայացուցիչներ Բարդուղ Գալստեանը եւ Նարինէ Ֆարսեանը:
Նշենք, որ «Նոր Արցախ» դաշինքը ձեւաւորուած է Ինքնութիւն եւ Միասնութիւն, Վաղուայ Արցախ եւ Ռամկավար Ազատական Կուսակցութիւններէն:
Մարտունի շրջանի Քերթ գիւղին մէջ քաղաքական ուժը յայտարարած է՝ «կու գանք փոխելու»: Ցուցակը գլխաւորող Կրիկորի Սահակեանի խօսքով, անհրաժեշտ ներուժն ունին. «Ծնօթանալով «Նոր Արցախ» դաշինքին, եզրակացութիւնը հետեւեալն է, որ դաշինքին մէջ առկայ է անհրաժեշտ մասնագէտներ թէ՛ տնտեսութեան զարգացման, թէ՛ ֆինանսական ոլորտի, բժիշկներ, դասախօսներ, ուսուցիչներ եւ իրաւաբաններ, այսինքն այն կարգի մասնագէտներ, որոնք այսօր անհրաժեշտ պիտի ըլլան յետագայ զարգացումները ապահովելու համար»:
Խորհրդարանական ընտրութիւններուն յաջողութեան հասնելու պարագային «Նոր Արցախ»ը արմատական բարեփոխումներ կը խոստանայ: Պետական կառավարման գործող համակարգը չի գոհացներ քաղաքական ուժը:
Ըստ Բարդուղ Գալստեանի, գիւղատնտեսութեան ոլորտին մէջ պիտի ներդնեն ապահովագրութեան համակարգը, որ գիւղացին հող մշակէ: «Մարդիկ, որոնք քաղաքը նստած բարձր պաշտօններ կը զբաղցնեն, պիտի չմշակեն ձեր հողերը, ձեզի ընդամէնը մի քանի գրոշ վճարելով, բերելով այն վիճակի, որ «դուք ի վիճակի չէք մշակելու, ատոր համար մենք կը մշակենք»: Այսինքն գիւղացին ինքը նախ եւ առաջ պէտք է իր համայնքին յատկացուած թէ՛ սեփականութեան, թէ՛ ֆոնտի պահուստային հողերու օգտագործողը ըլլայ»,-ըսած է Գալստեան:
Քարահունջի մէջ կայացած հանդիպման «Նոր Արցախ» կուսակցութիւններու դաշինքի ներկայացուցիչները ընդգծած են՝ իրենց բոլոր ծրագրերուն հիմքը մարդն է, կը կարծեն, որ օրէնքի եւ իրաւահաւասարութեան պայմաններուն մէջ հնարաւոր է երկրին մէջ կայուն զարգացում ապահովել:
«Պէտք է առաւելագոյնս փոխել մտածելակերպը, մարդը դարձնել արժէք, սահմանել օրինականութիւն, սահմանել իրաւահաւասար իրաւական դաշտ. ասոնք շատ կարեւոր դրոյթներ են, որ այսօր ուղղակի օդ ու ջուրի պէս անհրաժեշտ են»,- ըսած է դաշինքի անդամ Վահրամ Ղահրամանեանը:
Յիշեցնենք, որ նախագահի թեկնածուներէն «Նոր Արցախ» դաշինքը կը սատարէ Մասիս Մայիլեանին:
