Սեւ լիճի մէջ ատրպէյճանական կողմի գործողութիւններն անհանդուրժելի են. Նիկոլ Փաշինեանը՝ ԱԽ նիստին
Վարչապետի պաշտօնակատար Նիկոլ Փաշինեանի գլխաւորութեամբ տեղի ունեցած է Անվտանգութեան խորհուրդի արտահերթ նիստ, որու ընթացքին քննարկուած են Սիւնիքի մարզի Սեւ լիճ տեղանքին մէջ ստեղծուած իրավիճակը եւ հետագայ քայլերը:
Նիկոլ Փաշինեանն իր խօսքին մէջ, մասնաւորապէս, նշած է.
«Այսօրուայ Անվտանգութեան խորհրդի նիստը նուիրուած է Սիւնիքի մարզի Սեւ լիճ տեղանքում եւ յարակից տարածքում տեղի ունեցող իրադարձութիւններին: Այսօր առաւօտեան Ատրպէյճանի զինուած ուժերն այդ տեղանքում հատել են Հայաստանի Հանրապետութեան պետական սահմանը եւ խորացել մինչեւ 3,5 քիլոմեթր, ըստ էութեան, փորձ են անում պարփակել Սեւ լիճը:
Ի հարկէ այս գործողութիւններն անհանդուրժելի են Հայաստանի Հանրապետութեան համար, որովհետեւ դա ոտնձգութիւն է Հայաստանի Հանրապետութեան ինքնիշխան տարածքի նկատմամբ եւ ի հարկէ առանձին քննարկման առարկայ է, թէ ինչու եւ ինչպէս է հնարաւոր դարձել նման գործողութիւնը, բայց պէտք է արձանագրել, որ սա իր բնոյթով, ըստ էութեան, տիվերսիոն (ներթափանցում) անցում է:
Պէտք է նաեւ արձանագրել, որ ՀՀ զինուած ուժերը վաղ առաւօտից արձագանքել են տեղի ունեցող իրադարձութիւններին, իրականացուել են անհրաժեշտ մարտավարական տեղաշարժեր եւ այլ գործողութիւններ: Բայց հարկ է արձանագրել, որ ատրպէյճանական զինուած ուժերի գործողութիւնները չեն զուգորդուել հրաձգային կամ որեւէ այլ զէնքի կիրառմամբ եւ նրանք փորձում են հիմնաւորել իրենց գործողութիւններն ինչ-որ քարտէզներով, որոնք մեր առաջին իսկ դիտարկմամբ մտացածին եւ կեղծ են, որովհետեւ մեր տրամադրութեան տակ է դեռեւս Խորհրդային Միութեան ժամանակներում Սովետական Հայաստանի եւ Սովետական Ատրպէյճանի միջեւ հաստատուած, նաեւ Կեդրոնական իշխանութեան կողմից հաստատուած քարտէզ, որտեղ յստակ երեւում է, թէ Հայաստանի եւ Ատրպէյճանի միջեւ սահմանագիծն ինչպէս է անցնում:
Այնուամենայնիւ, ստեղծուած իրավիճակն անընդունելի է, Հայաստանի Հանրապետութիւնը չի կարող ուղղակի համակերպուել ստեղծուած իրավիճակի հետ, բայց նաեւ հաշուի առնելով իրադրութիւնը՝ մեր առաջնային ծրագիրը բանակցութիւնների միջոցով, նաեւ դիւանագիտական եղանակներով այս խնդիրը լուծելն է: Բայց սա տարբերակներից մէկն է:
Ես ուզում եմ մենք յստակ արձանագրենք, որ որեւէ կերպ չենք կարող հանդուրժել ու համակերպուել ստեղծուած իրավիճակի հետ եւ այսօր մենք Անվտանգութեան խորհրդի նիստում պէտք է քննարկենք այս պահին առկայ իրավիճակն ու մեր հետագայ անելիքները, հնարաւոր սենարները եւ այդ սենարների միջեւ առկայ ներքին փոխկապակցուածութիւնները: Հարկ եմ համարում ընդգծել, որ ինչպէս եւ կարելի էր, ցաւօք սպասել, իրավիճակը նաեւ ներքաղաքական շահարկումների առիթ է դառնում եւ դարձել: Ես ուզում եմ կրկին անգամ կոչ անել, որ արտաքին անվտանգութեան հետ կապուած իրավիճակները փորձ չարուի օգտագործել ներքաղաքական նպատակների համար, որովհետեւ սա ազգային անվտանգութեան հարց է եւ տուեալ իրավիճակում մեզ պէտք է կեդրոնանալ խնդրի ու նրա լուծման վրայ:
Կրկին ուզում եմ արձանագրել, որ կրակոցների, փոխհրաձգութիւնների, մարտական գործողութիւնների, վիրաւորների, զոհերի մասին տեղեկութիւնները որեւէ կապ չունեն իրականութեան հետ, միւս կողմից, սակայն, պէտք է արձանագրել, որ իրավիճակն առնուազն մերձճգնաժամային է, եթէ չասենք ճգնաժամային: Եւ եթէ այդպէս չլինէր, մենք Անվտանգութեան խորհրդի նիստ հրաւիրելու առիթ չէինք ունենայ: Բայց ամէն դէպքում այս իրավիճակում մեզ անհրաժեշտ է պահպանել սառնասրտութիւն, միւս կողմից անհրաժեշտ է լինել հետեւողական մեր պետական եւ ազգային շահերի պաշտպանութեան տեսանկիւնից, եւ մենք նաեւ այսօր պէտք է որոշումներ կայացնենք անելիքների ու հետագայ գործիքակազմի վերաբերեալ»:
