Սիւնիքի տարածքէն ոչ մէկ միլիմեթր զիջման մասին խօսք կրնայ ըլլալ. Վարչապետը անդրադարձաւ սահմանային իրավիճակին
Սիւնիքի մարզին մէջ ներկայիս տեղի կ'ունենան սահմանային կէտերու տեղորոշման աշխատանքներ, որոնք ունին որոշակի բարդութիւններ: Այդ մասին կառավարութեան նիստի ժամանակ նշած է վարչապետ Նիկոլ Փաշինեանը:
«Մեր համոզմունքն այն է, որ այդ աշխատանքը պէտք է տեղի ունենայ, որն անհրաժեշտ է Սիւնիքի եւ ընդհանրապէս ՀՀ-ի անվտանգութեան ապահովման տեսանկիւնից: Յամենայնդէպս մեր դիրքորոշումը, Պաշտպանութեան նախարարութեան դիրքորոշումն այն է, որ մենք այս գործունէութեամբ, որը կարող է ամենատարբեր մեկնաբանութիւնների տեղիք տալ, աւելացնում ենք Սիւնիքի անվտանգութեան երաշխիքները, Սիւնիքի եւ ՀՀ-ի անվտանգութեան երաշխիքների նոր համակարգ ենք ձեւաւորում:
Ի հարկէ, այնտեղ երկու բնակավայր ունենք, որոնց հետ կապուած կարող են ծագել որոշակի հարցեր. մէկը Սիւնիքի մարզի Որոտանի, երկրորդը` Շուռնուխ բնակավայրի մասին է, որտեղ կան որոշակի սահմանային հարցեր, որոնց շուրջ ամենօրեայ աշխատանք է տեղի ունենում: Այդ հարցերը կարող են որոշակի ցաւոտ իրավիճակների բերել, բայց ես նաեւ ուզում եմ հաւաստիացնել, որ բոլոր այն պարագաներում, եթէ մեր քաղաքացիների շահերի տեսանկիւնից որոշակի հարցեր կ'առաջանան, կառավարութիւնը լիարժէքօրէն եւ միարժէքօրէն համարժէք փոխհատուցումներով հանդէս կը գայ եւ մեր քաղաքացիների շահերը լիարժէք կը լինեն պաշպանուած»,- ըսած է վարչապետը:
Կառավարութեան ղեկավարը նկատեց նաեւ, որ այս առումով ապատեղեկատուական արտահոսք տեղի կ'ունենայ: «Ուզում եմ կրկնել, որ Սիւնիքի եւ ընդհանրապէս ՀՀ-ի միջազգայնօրէն ընդունուած ճանաչուած տարածքից ոչ մի միլիմեթր զիջման մասին խօսք չի եղել եւ չի կարող լինել, միւս կողմից սա չի նշանակում, թէ այս գործընթացները պէտք է համարել սահմանների դեմարկացիա եւ դելիմիտացիա, դրանք բոլորովին տարբեր հարցեր են»,- ըսած է Փաշինեան:
