Ստեփանակերտը դեռ 25–30%-ով ջրազրկուած է
Ստեփանակերտի մէջ ջուրի խնդիրը կը շարունակէ չլուծուած մնալ։ Արցախի մայրաքաղաքը այժմ ջրազրկուած է 25–30%-ով, իսկ նախորդ շաբաթ՝ 40–45%–ով։
«Ստեփանակերտի շուրջօրեայ ջրամատակարարման գօտիները բաշխուած է 12–ի, որոնցից այս պահուն 6–րդ գօտու մօտ 70%-ն է ջրազրկուած։ Չորս օր առաջ արտեզեան խորքային նոր պոմպ՝ 18–րդն ենք միացրել 9–րդ եւ 10–րդ գօտիներին եւ արդէն երկու օր է՝ շուրջօրեայ ջրամատակարարումը վերականգնուել է։ Նախկինում եթէ Ստեփանակերտի 40–45%–ն էր ջրազրկուած, ապա հիմա 25–30%-ն է ջրազրկուած»,– ըսած է Արցախի «Ջրմուղ–կոյուղի» ՓԲԸ տնօրէն Գագիկ Պօղոսեանը։
Անոր խօսքով՝ ջրազրկուած թաղամասերը Ստեփանակերտի ամենաբարձր դիրքերուն մէջ են. «Ամէն ինչ անում ենք, որ գոնէ օրական մէկ կամ երկու ժամով ջուր տանք, բայց չի լինում։ Ցանցը չի թոյլատրում, որ ջուրը մաս–մաս բաժանենք»։
Գագիկ Պօղոսեանը տեղեկացուցած է, որ քանի մը օր է՝ Կարմիր խաչի միջազգային կոմիտէի Ստեփանակերտի գրասենեակը 15 հատ փլասթիկ ջրամբարներ տրամադրած են՝ 5 եւ 3 թոն տարողութեամբ, որոնք տեղադրուած են Ստեփանակերտի ջրազրկուած թաղամասերու բազմաբնակարն շէնքերու բակերուն մէջ։ Կարմիր Խաչը նախօրէին եւս 10 ջրամբարներ տրամադրած են, այս անգամ արդէն 5 եւ 2 թոն տարողութեամբ։
Յիշեցնենք, որ Ստեփանակերտի մէջ ջրանջատումները սկսած են 6 Օգոստոսի երեկոյեան ժամերէն։ Ստեփանակերտի քաղաքապետի որոշմամբ, 10 Օգոստոսէն, մայրաքաղաքի մէջ գործող բոլոր ինքնաշարժի լուացման կէտերու եւ հանգիստի գօտիներու ջրօգտագործումը դադարեցուած է մինչեւ քաղաքը սնուցող զտիչ կայաններուն մէջ ջուրի պաշարներու վերականգնումը:
