Տնտեսական շարժունութեան ցուցանիշը 8 ամսուան մէջ աճած Է 4,9 տոկոսով

Հայաստանի տնտեսական շարժունութեան ցուցանիշը 2021-ի Յունուար-Օգոստոսին 2020-ի նոյն ժամանակամիջոցի համեմատ աճած է 4,9 տոկոսով: «Արմէնփրէս»-ի հաղորդմամբ՝ այս մասին փաստած են ՀՀ վիճակագրական կոմիտէի հրապարակած տուեալները:

Արդիւնաբերական արտադրանքի ծաւալը Յունուար-Օգոստոսին՝ 2020-ի նոյն ժամանակամիջոցի համեմատ աճած է 1 տոկոսով, եւ շինարարութեան ծաւալը՝ 7,3 տոկոսով:

Առեւտուրի շրջանառութեան մէջ Յունուար-Օգոստոսին աճը կազմած է 7,1 տոկոս, իսկ մատուցուած ծառայութիւններու ծաւալը (առանց առեւտուրի) աճած է 5,3 տոկոսով:

Հայաստանի 2021 թուականի Յունուար-Օգոստոսին սպառողական գներու ցուցանիշը աճած է 6,4 տոկոսով, արդիւնաբերական արտադրանքի գներու ցուցանիշը՝ 9,8 տոկոսով, իսկ ուժանիւթի արտադրութեան ծաւալը նուազած է 1,5 տոկոսով:

Արտաքին առեւտրաշրջանառութեան ծաւալներուն մէջ այս տարուայ Յունուար-Օգոստոսին նախորդ տարուայ նոյն ժամանակի համեմատ նկատուած է 12,7 տոկոս աճ:

Հայաստանէն արտահանումը աճած է 21.8 տոկոսով, ներմուծումը՝ 7,7 տոկոսով: Դրամի փոխարժէքը ԱՄՆ տոլարի նկատմամբ 2021-ի Յունուար-Օգոստոսին եղած է 514.38: