Փաշինեան անդրադարձաւ սահմանային միջադէպին՝ եղածը համարելով առեւանգում
Տեղեակ էք, որ այսօր առաւօտեան միջադէպ ունեցած ենք հայ-ատրպէյճանական սահմանին, եւ ես կարեւոր կը համարեմ տեղեկացնել, թէ ինչ տեղի ունեցած է: Այս մասին, 27 Մայիսին, կառավարութեան նիստի ժամանակ յայտարարած է ՀՀ վարչապետի պաշտօնակատար Նիկոլ Փաշինեանը:
«ՀՀ ԶՈՒ 6 զինծառայողներ ՀՀ ինքնիշխան տարածքում իրականացնելիս են եղել սահմանի կահաւորման աշխատանքներ: Իրականացուել են ականապատման աշխատանքներ, ընդ որում ուզում եմ յատուկ ընդգծել, որ դրանք իրականացուել են զգուշացնող նշանների տեղադրմամբ: Այսինքն դրանք չեն արուել դիւերսիոն (ներթափանցման) նպատակներով: Այս գործողութիւններն արուել են մեր սահմանի պաշտպանութեան մակարդակը բարձրացնելու նպատակով: Ի հարկէ, հետագայում արդէն եղել է տեղեկատուութիւնը, որ մեր զինուորները գերեվարուել են: Հանգամանքներն, ի հարկէ, դեռ պէտք է պարզուեն, բայց սա ըստ էութեան, գերեվարում չէ: Տեղի է ունեցել մեր զինծառայողների առեւանգումը ՀՀ տարածքից: Դուք տեղեակ էք, որ այդ տարածքներում Մայիսի 12-ից գտնուում են նաեւ Ատրպէյճանի ԶՈՒ ստորաբաժանումներ եւ հարցը հենց այս համատեքստում է: Ուզում եմ յատուկ ընդգծել, որ տեղի ունեցող գործընթացները բացարձակապէս անընդունելի են մեզ համար: Այս կարգի միջադէպերը տեղի են ունենում այն պատճառով, որ ոմանք ուզում են այնպէս անել, որ մենք համակերպուենք մեր տարածքում ատրպէյճանական ուժերի ներկայութեան հետ, ինչը տեղի ունենալ չի կարող:
Պէտք է արձանագրել, որ դէպքը տեղի է ունեցել մեր տարածքում, մեր 6 զինծառայողները ունեցել են սահմանի կահաւորման խնդիր, որը շարունակաբար տեղի է ունենում սահմանի ողջ երկայնքով: Շատ կարեւոր եմ համարում, որ այս դէպքի առիթով, հարցը ամենեւին չպէտք է օգտագործուի ներքաղաքական նպատակներով:
Կարծում եմ, որ պէտք է դատապարտել այս իրավիճակը բանակի եւ ԶՈՒ-ի դէմ օգտագործելու բոլոր փորձերը»,-յայտարարած է Նիկոլ Փաշինեանը:
Ան նաեւ աւելցուցած է, որ վերջին օրերուն տեղի ունեցող միջադէպերն կ'արձանագրեն, որ սա ամենեւին սովորական իրադրութիւն չէ, ինչպէս փորձ կ'ըլլայ ներկայացնել մասնաւորապէս, Ատրպէյճանի իշխանութեան կողմէ. «Սա Հայաստանի ինքնիշխանութեանը, տարծքային ամբողջականութեանը սպառնացող ուղղակի վտանգ է, որը միջազգային իրաւունքի կոպտագոյն խախտում է: Սա այն պարագան է, որ ՀՀ-ն պէտք է օգտագործի բոլոր այդ միջազգային լծակները իրադրութիւնը շտկելու եւ կարգաւորելու համար: Մենք դրա համար բոլոր անհրաժեշտ միջոցները ձեռնարկելու ենք:
Շատ կարեւոր է, որ յստակ տեղեկատուութիւն տրուի տեղի ունեցածի եւ դրա համատեքստի մասին, որպէսզի ատրպէյճանական ապատեղեկատուութիւնը չտարածուի այդ թուում հայկական լրատուական տիրոյթում: Ես կարծում եմ, որ մեր հանրութիւնը այսօր առաւել եւս պէտք է համախմբուած լինի մեր բանակի, պետական ինստիտուտների շուրջ, որ մենք այս իրադրութիւնը յաղթահարենք»,-ըսած է վարչապետի պաշտօնակատարը:
Ան ընդգծած է, որ պէտք է հակառակորդի երկու նպատակներն արձանագրել եւ կառավարել. «Նպատակներից մէկն այն է, որ իրադրութիւնը զարգացնել այնպէս, որ իրենց զինուած ուժերի ներկայութիւնը մեր տարածքում դիտուի որպէս սովորական բան: Երկրորդ սենարն է հրահրել ռազմական բախում՝ իրադրութիւնը վերահսկողութիւնից դուրս բերելու նպատակով: Մենք այս երկու նպատակներից ոչ մէկին տուրք չպէտք է տանք: Ատրպէյճանի զինուած ուժերն անվերապահօրէն պէտք է դուրս գան ՀՀ տարածքից: Երկրորդը, մենք բոլոր իրավիճակներում լինելու ենք սթափ, շրջահայեաց, սադրանքների կառավարումը պէտք է իրականացնենք շրջահայեացօրէն: ՀՀ Զինուած ուժերը պէտք է կատարեն սահմանների պահպանութեան եւ ամրութեան, տարածքային ամբողջականութիւնը պահպպանելու իրենց գործառոյթները: Ինչքան էլ մենք այսօր դժուար իրադրութիւնների միջով ենք անցնցում, ներվային (ջղային) եւ չհաւասարակշռուած գործողութիւնները, յայտարարութիւնները, կեցուածքները ամենեւին տեղին չեն»:
