44-օրեայ պատերազմում պարտութեան ծանրութիւնը կախուած է Հանրապետութեան հրապարակի վրայ. Վարչապետի ուղերձը Անկախութեան օրուան առթիւ
«Ի՞նչ կը տեսնենք, եթէ նայենք մեր 30-ամեայ պետութեանը. կը տեսնենք յաջողութիւններ ու անյաջողութիւններ, կը տեսնենք յաղթանակներ ու պարտութիւններ, արցունքներ ու բերկրանք, ոգեշնչում ու յուսահատութիւն, հիացմունք ու հիասթափութիւն, պատերազմներ, պատերազմում կրած յաղթանակ ու պարտութիւն: 2020 թ. 44-օրեայ պատերազմում պարտութեան ծանրութիւնը կախուած է Հանրապետութեան հրապարակի վրայ»: Այս մասին Հանրապետութեան հրապարակին վրայ Անկախութեան 30-ամեակի տօնական միջոցառման ընթացքին ունեցած ելույթին մէջ յայտնեց ՀՀ վարչապետ Նիկոլ Փաշինեան:
«Ինչպէ՞ս ապրել այդ աղէտից յետոյ, ինչպէ՞ս նայել զոհուածների հայրերի, մայրերի, այրիների ու զաւակների աչքերին, ինչպէ՞ս անել, որ նրանց զոհողութիւնն անիմաստ չդիտարկուի: Պէտք է ձեւակերպել ապագայի ուղենիշն անկախ պետութեան առաջիկայ տասնամեակների համար:
Պատմութիւնն ապացուցել է, որ պատերազմում յաղթանակը միշտ չի դարձել յաղթանակ, ինչպէս որ պարտութիւնը միշտ պարտութիւն չի դարձել: Պատմութիւնը ցոյց է տուել, որ յաղթելու համար պարտադիր չէ եւ երբեմն պէտք չէ յաղթել ուրիշներին, յաղթել նշանակում է յաղթել յուսահատութեանը, ճակատագրին, մահուանը, անելանելիութեանը: Նահատակներն ընկան, որ Հայաստանն ապրի, որ Արցախը ապրի, եւ քանի Հայաստանը ապրում է, քանի ապրում է Արցախը, նրանք կենդանի են: Երբ զարգանում է ՀՀ-ն եւ Արցախը, ուրեմն նրանց զոհողութիւնը հասել է իր նպատակին», նշեց վարչապետը:
