ՌԱԿ Կեդրոնական Վարչութեան պատուիրակութիւնը այցելեց ՀՀ Սփիւռքի գործերու գլխաւոր յանձնակատար Պրն. Զարեհ Սինանեանին
Երեքշաբթի՝ 21 Յունիս, 2022-ին, ՌԱԿ Կեդրոնական Վարչութեան պատուիրակութիւնը, վարչութեան ատենապետ Ընկ. Մայք Խարապեանի գլխաւորութեամբ այցելեց ՀՀ սփիւռքի գործերու գլխաւոր յանձնակատար Պրն. Զարեհ Սինանեանին:
Ընկ. Խարապեանի գլխաւորած պատուիրակութեան մաս կազմեցին Կեդրոնական վարչութեան անդամներ՝ Ընկ. Յակոբ Անդրէասեան (Երուսաղէմ), Ընկ. Լեւոն Պըլըխեան (Երեւան), Ընկ. Նորայր Մկրտիչեան (Նիւ Եորք-Նիւ Ճըրզի), Ընկ. Վազգէն Էսքիճեան (Ֆրանսա), Ընկ. Փանիկ Քէշիշեան (Լոս Անճելըս), Ընկ. Հայկ Լեփեճեան (Աւստրալիա), ինչպէս նաեւ ԱԺ պատգամաւոր Պրն. Վիգէն Խաչատրեան:
Հանդիպման, Գլխաւոր յանձնակատարը ողջունելով հիւրերը՝ շնորհաւորեց ՌԱԿ հիմնադրման 100-ամեակի առթիւ:
Պրն. Սինանեան ընդգծեց, որ մեծ է ՌԱԿ-ի ներդրումը սփիւռքի եւ հայրենիքի մէջ հայապահպանութեան, հայկական շահերու պաշտպանութեան, համայնքներու զօրացման, Հայաստան-սփիւռք կապերու ամրապնդման ուղղութիւններով, եւ անուրանալի է նաեւ կուսակցութեան գաղափարախօսութեան իրական նուիրեալներու առաքելութիւնը, որն է՝ ըլլալ հայրենիքի կողքին որեւէ պարագայի, նպաստել պետականութեան կայացման, պետութիւնը վեր դասել անձերէ եւ հանգամանքներէ:
Ռամկավար Ազատական Կուսակցութեան Կեդրոնական Վարչութեան ատենապետ Ընկ. Մայք Խարապեան, շնորհակալութիւն յայտնելով Պրն. Սինանեանին, ընդգծեց անոր ղեկավարած կառոյցի կարեւորութիւնը, նշելով, որ Սփիւռքը կը մնայ Հայաստանի կարեւորագոյն եւ արժանահաւատ ուժերէն մին:
Այնուհետեւ ՌԱԿ ներկայացուցիչները ծանօթացան գրասենեակի գործունէութեան, ծրագիրներուն, նախաձեռնութիւններուն եւ պատրաստակամութիւն յայտենցին աջակցելու սփիւռքի մէջ այդ ծրագիրերու տարածման գործին։ Երկար զրոյց ծաւալեցաւ նաեւ սփիւռքի մէջ առկայ խնդիրներու շուրջ:
